Ministria e Mbrojtjes - Arkivi 2008-2013

NATO në Samitin e Çikagos

Çikago, 20 maj 2012

Udhëheqësit e NATO arritën një marrëveshje në Çikago se do t’i mundësojnë Aleancës sigurinë për dekadën e ardhshme dhe më tej.
Në seancën e parë të punës, Krerët e Shteteve dhe Qeverive të NATO miratuan një paketë konkrete projektesh shumëkombëshe që do t’i lejojnë aleatët të ndajnë barrën e sigurisë ashtu siç ndajnë përfitimet.
Ata ranë dakord për të përvetësuar një kulturë të re bashkëpunimi, duke vënë në qendër të kësaj qasjeje të re, Mbrojtjen e Zgjuar.

“Mbrojtja e Zgjuar është një parim me rëndësi jetike. Ne kemi rënë dakord për ta bërë atë mënyrën e re në bazë të së cilës NATO do të vijojë aktivitetin, dhe po e zbatojmë. Sot, ne kemi miratuar një paketë të fuqishme prej më shumë se 20 projektesh multinacionalë, për të siguruar aftësitë e nevojshme, me një çmim që mund të përballohet ", tha Sekretari i Përgjithshëm.

Udhëheqësit e NATO ranë dakord të gjejnë mundësi të reja për të bashkëpunuar më ngushtë kundrejt forcave moderne të pajisura dhe të trajnuara, në mënyrë që të mund të veprojnë së bashku dhe me partnerët në çdo mjedis. Ata ranë dakord të rrisin numrin e stërvitjeve, trajnimet dhe edukimin si dhe të ruajnë aftësitë e perfeksionuara nëpër operacione.

"Objektivi ynë: Forcat e NATO në 2020 - një Aleancë që gjen zgjidhje kundrejt sfidave ekonomike të ditëve të sotme, dhe është e përgatitur për sfidat e sigurisë në të ardhmen," tha Sekretari i Përgjithshëm. "Këto vendime tregojnë se pavarësisht sfidave ekonomike, aleatët janë të angazhuar të sigurojnë, zhvillojnë dhe të ruajnë aftësitë dhe shkathtësitë që nevojiten për të siguruar që Aleanca jonë të jetë gjithmonë e aftë për të përmbushur objektivat."

Në takimin e tyre në Çikago, udhëheqësit e NATO gjithashtu deklaruan një kapacitet të përkohshëm të mbrojtjes raketore, që do t’i japë mundësinë Aleancës për t'iu përgjigjur kërcënimeve me raketa në një mënyrë të koordinuar dhe t’i lidhë së bashku asetet e mbrojtjes raketore nga aleatët e ndryshëm.

“Kjo është me të vërtetë një punë ekipore trans-atlantike: Shtetet e Bashkuara dhe Aleatët Evropianë që investojnë në sigurinë tonë të përbashkët. Ky është një shembull i shkëlqyer i kulturës së ripërtërirë të bashkëpunimit që ne e quajmë Mbrojtja e  Zgjuar: vende që punojnë së bashku për të zhvilluar aftësitë që ata nuk mund t’i zhvillojnë vetëm”, tha Sekretari i Përgjithshëm.

Krerët e Shteteve dhe Qeverive të NATO miratuan gjithashtu rezultatet e shqyrtimit të qëndrimit të përgjithshëm të Aleancës në frenimin dhe mbrojtjen kundër gamës së  plotë të kërcënimeve ndaj Aleancës, siç u vendos në Samitin e Lisbonës në vitin 2010.
Duke marrë parasysh ndryshimet në mjedisin ndërkombëtar të sigurisë, rishqyrtimi i tij ka treguar se NATO aktualisht ka aftësitë e duhura për të përmbushur sfidat e sigurisë të një bote të paparashikueshme. Në të njëjtën kohë, Aleatët ranë dakord se NATO do të vazhdojë të rregullojë strategjinë dhe aftësitë e saj në përputhje me tendencat e mjedisit të sigurisë.

Në Samitin e Aleancës në Lisbonë në vitin 2010, udhëheqësit e NATO paraqitën një agjendë ambicioze duke përfshirë krijimin e një sistemi të mbrojtjes nga raketat. Në Samitin e Çikago, udhëheqësit e NATO po përqëndrohen në atë që ata kanë përcaktuar si synim për të arritur.

Marrë nga faqja zyrtare e NATO: www.nato.int