Ministria e Mbrojtjes - Arkivi 2008-2013

NATO, arrihen objektivat e Samitit të Çikagos

Liderët e NATO përfunduan një takim vendimtar në Çikago, më 21 Maj, duke marrë vendime kyçe mbi të ardhmen e angazhimeve të Aleancës në Afganistan, kapacitetet ushtarake dhe partneritetet në mbarë botën.

b_250_170_16777215_00___images_rasmunsen-cikago.jpg“Ne mbërritëm në Çikago me tre objektiva. Ne i kemi arritur ata. Ne u fokusuam mbi të ardhmen e Afganistanit. Ne vendosëm të investojmë me zgjuarsi në mbrojtjen tonë edhe pse në një kohë me vështirësi ekonomike. Ne kemi krijuar marrëdhënie me partnerët tanë nëpër botë në kuadër të sfidave me të cilat përballemi të gjithë të shekullin e 21-të,” tha Sekretari i Përgjithshëm i NATO  Anders Fogh Rasmussen pas dy ditë takimesh të njëpasnjëshme.

Sekretari i Përgjithshëm foli pas sesionit final të samitit - një takim unik me 13 vende partnere nga e gjithë bota të cilët së fundmi kanë dhënë një kontribut të veçantë politik, operacional dhe financiar në operacionet e drejtuara nga NATO.
“Të gjithë partnerët tanë ndajnë dëshirën e NATO për të ndërtuar siguri, por ata kontribuojnë në punën tonë në shumë mënyra të ndryshme,” tha Sekretari i Përgjithshëm.
Samiti përcaktoi një strategji për të përfunduar kalimin e përgjegjësisë së sigurisë te forcat  Afgane në fund të 2014, dhe shprehu një angazhim të fortë për të mbështetur forcat Afgane pas kësaj date.  
“Këtu në Çikago, kemi shënuar rrugën për të kompletuar misionin tonë në Afganistan. Ne e kemi bërë të qartë angazhimin tonë për të stabilizuar dhe siguruar Afganistanin, së bashku me partnerët tanë afganë dhe komunitetin ndërkombëtar.” tha Sekretari i Përgjithshëm.
Liderët e Aleancës ranë dakord se NATO është gati të punojë drejt përcaktimit të një faze të re post-misionit 2014, me kërkesën e Qeverisë së Republikës Islamike të Afganistanit, për të trajnuar, këshilluar dhe mbështetur forcat afgane. Ky nuk do të jetë një mision luftimi.
Liderët gjithashtu morën një sërë vendimesh të projektuar për të siguruar që Aleanca të ngelet e aftë për trajtimin e gjithë gamës të sfidave ndaj sigurisë, edhe në kohë me vështirësi ekonomike.
“Këtu në Çikago, ne ramë dakord të implementojmë një kulturë të re bashkëpunimi, kështu që kombet do të mund të arrijnë sëbashku atë që nuk arrijnë dot të vetëm. Ne e zbatuam atë në praktikë duke rënë dakord mbi projekte të cilat do të na krijojnë kapacitetet e nevojshme, me një çmim të cilin mund ta përballojmë,” tha Sekretari i Përgjithshëm.
Liderët e Aleancës shprehën vlerësimin e tyre për mikpritjen bujare të Qeverisë së Shteteve të Bashkuara për njerëzit dhe qytetin e Çikagos.
“Çikago është i famshëm për mendimet e mëdha dhe për të bërë gjëra madhështore. Ju sapo keni organizuar samitin më të madh në të gjithë historinë e NATO, dhe këtë gjë e keni bërë me një stil madhështor. Vendimet që ne kemi marrë këtu në Çikago do të përforcojnë lidhjen vitale midis Amerikës së Veriut dhe Europës dhe forcojnë NATO për vitet e ardhshme,” tha Sekretari i Përgjithshëm.

Marrë nga faqja zyrtare e NATO: www.nato.int