Ministria e Mbrojtjes - Arkivi 2008-2013

Mbi 50 fëmijë dhe familjarë të ushtarakëve me mision jashtë atdheut në një tur turistik në bregdetin jonian

27 gusht 2012

Foto Galeri

b_255_156_16777215_00___images_galeria_2012_Gusht_27_1.jpgNë kuadër të veprimtarive që po zhvillon Qendra e Kulturës, Medias dhe Botimeve të Mbrojtjes (QKMBM) në këtë vit të 100 - Vjetorit të Pavarësisë, për gati një javë një grup prej më se 50 fëmijësh, bashkëshortesh dhe familjarësh të ushtarakëve që shërbejnë në misione jashtë atdheut zhvilluan një tur turistiko-argëtues përgjatë bregdetit të Jonit. Ky aktivitet pati interesimin dhe kujdesin e drejtpërdrejtë të ministrit të Mbrojtjes, z. Arben Imami.

Gjatë këtij turi të bukur turistik, fëmijët dhe gratë e ushtarakëve fillimisht u ndalën dhe vizituan Bazën e Riparimit të Anijeve në Pashaliman, ku u pritën nga drejtori i kësaj baze Harilla Dafi, i cili i njohu të pranishmit me të gjithë proceset e punës që kryhen në këtë kantier. Ka kohë që në Kantierin Detar në Pashaliman ka nisur zbatimi i një projekti për ndërtimin e katër anijeve në bazë të një kontrate të nënshkruar nga qeveria shqiptare, Ministria e Mbrojtjes, me shoqërinë holandeze “Damen Shipyards”. Anija e parë “Iliria”, sipas kontratës, është ndërtuar në Holandë, ndërsa në Pashaliman është ndërtuar anija “Oriku” dhe është në proces ndërtimi anija “Lisus”, e cila do t’i dorëzohet së shpejti Flotës Detare. Njëkohësisht ka filluar ndërtimi i anijes së fundit të projektit me emrin “Butrinti”. Nën shoqërimin e drejtorit të kantierit, fëmijët dhe familjarët e ushtarakëve vizituan ambientet ku prodhohej dhe vizita përfundoi me një foto grupi në anijen “Lisus”.
Në vijim, grupi i fëmijëve dhe grave të ushtarakëve me mision jashtë atdheut vizituan kalanë e Ali Pashë Tepelenës në Porto Palermo, ku u njohën më nga afër me ambientet e kësaj kalaje të vjetër, si dhe me historinë që mbart ajo.
Më pas ata u sistemuan në kampingun fushor të rinisë në Qeparo. Sektori i Rekreacionit në QKMBM, në bashkëpunim me administratorët e kampingut ju ofruan familjarëve të ushtarakëve kushte sa më të mira akomodimi dhe argëtimi. Bregdeti i mrekullueshëm jonian, mbrëmjet e magjishme mes muzikës dhe programeve recitale të përgatitura nga fëmijët, këndi i lojërave me dorë, zjarret e ndezura në mes të natës, si dhe shumë aktivitete të tjera mbushën orët e këtyre ditëve në Qeparo. Ministri i Mbrojtjes, z. Arben Imami, i cili shoqërohej nga kryetari i Këshillit të Qarkut të Vlorës vizitoi pushuesit në këtë kamping. Ministri Imami tregoi një vëmendje të veçantë kundrejt plotësimit të kushteve sa më të mira për një qëndrim komod, çlodhës, argëtues, por edhe me një kosto sa më të ulët. Me këtë rast, ai ka falënderuar administratorët, por edhe organizatorët e tjerë të këtij kampingu, për mundësinë që u dhanë fëmijëve dhe grave të ushtarakëve për të përjetuar nga afër mrekullinë që fal ky kamping i ngritur në një vend si Qeparoi. “Risia e këtij viti, është se duke parë që kushtet këtu janë mjaft të mira, përfshimë dhe sugjeruam që të sillnim për disa ditë edhe gratë dhe fëmijët e ushtarakëve, kryesisht të atyre që janë me mision jashtë vendit, por edhe të tjerë. Unë, shpreh besimin dhe bindjen se vitin e ardhshëm në këtë kamping do të ketë kushte edhe më të mira”, - nënvizoi ministri Imami.
Ndërsa Spiro Curri, administratori i kampingut të Qeparoit, theksoi se bashkëpunimi me Ministrinë e Mbrojtjes vazhdon i suksesshëm ashtu si edhe në dy vitet e shkuara. “Ne përpiqemi që të përfshijmë të gjitha moshat në këtë kamping, që nga fëmijët, të rinjtë, por edhe prindërit e tyre. Këtë vit, ndryshe nga vitet e tjera, janë përfshirë edhe familjet e ushtarakëve që janë me mision në Afganistan. Ky ishte një mendim që na lindi një vit më parë, por që u mundësua dhe u realizua gjatë këtij viti. Mendoj që vitin që vjen ta çojmë edhe më tej këtë ide, si dhe të zgjerohemi, duke i ofruar pushuesve tanë kushte sa më të mira, pa prekur sigurisht bukuritë e natyrës”, ka nënvizuar administratori Curri.
Një surprizë e bukur ishte sidomos lidhja që u bë nëpërmjet Skype midis fëmijëve të ushtarakëve dhe baballarëve të tyre, që shërbejnë në misione. Në këto biseda nuk mund të ndaleshin momentet prekëse, të cilat u shoqëruan edhe me lot e përmallim nga fëmijët e ushtarakëve.
Kampingu i Qeparoit është ndërtuar duke mos cenuar asgjë nga bukuria dhe harmonia që mbretëron në këtë perlë të Rivierës Shqiptare. Natën, mbretëron qetësia dhe freskia që vjen nga deti, ndërsa në pikun e vapës, flladi që vjen mes pemëve mposht temperaturat e larta të të nxehtit afrikan. Në këtë mrekulli të natyrës sonë bregdetare kaluan këto ditë të lumtura dhe të qeta grupi i fëmijëve dhe grave të ushtarakëve tanë që shërbejnë me misione të vështira jashtë atdheut në emër të paqes dhe sigurisë globale.