Ministria e Mbrojtjes - Arkivi 2008-2013

Koncert artistik ,“Një shekull këngë dhe marshe patriotike”

4 dhjetor 2012

Foto Galeri

b_230_153_16777215_00___images_galeria_2012_Dhjetor_4c_3.jpgSot në mbrëmje, në nder të 100-vjetorit të krijimit të Forcave të Armatosura, në Pallatin e Kongreseve Tiranë, Ministria e Mbrojtjes, nën kujdesin e drejtpërdrejtë të ministrit të Mbrojtjes, z. Arben Imami, organizoi një koncert artistik me titull “Një shekull këngë dhe marshe patriotike”.Të pranishëm në këtë veprimtari të bukur artistike ishin ministri i Mbrojtjes, z. Arben Imami, shefi i Shtabit të Përgjithshëm i FA, gjeneralmajor Xhemal Gjunkshi, ministri i Kulturës, z. Aldo Bumçi, deputetë, gjeneralë, përfaqësues të trupit diplomatik të akredituar në vendin tonë, ushtarakë dhe punonjës të FA, përfaqësues të komuniteteve fetare, si dhe qytetarë të kryeqytetit.

Koncerti është hapur me himnin kombëtar “Rreth flamurit të përbashkuar”. Më pas, është ekzekutuar “Garda Krutane”, me muzikë të Pjetër Dungut dhe dirigjent Halim Teqja. Këngët “Dua më shumë Shqipërinë”, me fjalët nga Kol Tromara, orkestrim të Thoma Gaqit dhe soliste Eliona Gjyzeli; “Dragojtë e Shqipërisë”, me fjalët e Mihal Ballkamenit, orkestrim të Th. Gaqit; “O trima luftëtarë”, me fjalët dhe muzikë të Thanas Floqit dhe orkestrim të Josif Mingës, si dhe këngët patriotike partizane, “Rini-rini” dhe “Kushtrimi i Lirisë”, me muzikë të Dhora Leka dhe orkestrim të E. Krantja , “Gryka e Mezhgoranit”, me muzikë të M. Krantja , orkestrim të E. Krantja, solist A. Likaj, i dhanë ngjyrime të bukura dhe tepër tërheqëse këtij koncerti shumë të veçantë në llojin e vet.

Ndërsa, rapsodia për orkestër frymore, “Populli u këndon heronjve”, me muzikë të K. Laros, kënga e “Grykës së Kaçanikut”, me muzikë të Pjeter Gacit , kënga arbëreshe “O e bukura more”, e përshtatur nga Çesk Zadeja dhe soliste Eriona Gjyzeli, kënga arvanitase “Qani trima dhe Kostandini” nga Thanassis Moraitis me solist Redon Makashi, Altin Goci, evokuan trimërinë e popullit tonë në shekuj, si dhe mallin që kanë për vendin e të parëve të tyre, shqiptarët arbëresh dhe arvanitas.
Koncerti ka vijuar më disa këngë të tjera shumë të njohura si, “O ju male”, “Sa të rrojë gjithësia”, “Shkronjave të Alfabetit” dhe “Vlora-Vlora”, të cilat janë mirëpritur dhe duartrokitur nga pjesëmarrësit e këtij koncerti, që kishin mbushur sallën e Pallatit të Kongreseve. Sidomos kënga “Xhamadani vija-vija” u prit me mjaft entuziazëm dhe krijoi një atmosferë të bukur, duke u kënduar nga të gjithë të pranishmit në sallë.

Koncerti është mbyllur me “Skena e betejës” nga filmi “Skënderbeu”, me muzikë të kompozitorit të shquar Çesk Zadeja dhe G. Sviridov, e përshtatur për orkestër frymore nga Vasil S. Tole.
Udhëheqës artistik i këtij koncerti ishte Ermir Krantja, mjeshter kori Zana Turku, regjizor Pali Kuke dhe kurotor programi Vasil S. Tole, ndërsa është drejtuar me shumë nivel dhe profesionalizëm nga dirigjentët e mirënjohur Ermir Krantja, Zana Turku dhe Halim Teqja. Vlen të veçohet edhe interpretimi mjeshtëror i solistëve të mirënjohur Kastriot Tusha, Erjona Gjyzeli, Armando Likaj, si dhe i këngëtarëve Redon Makashi dhe Altin Goci.

Koncerti artistik “Një shekull këngë dhe marshe patriotike” ishte një tjetër tregues i kujdesit dhe punës së mirë e plot pasion që ka bërë dhe bën QKMBM dhe punonjësit e saj që merren me aktivitetet artistike për të sjell për ushtarakët tanë dhe mbarë publikun artëdashës vepra dhe shfaqje artistike të këtij niveli nga krijimtaria artistike e autorëve të vendit tonë. Ky koncert sa i arrirë e i bukur, aq edhe i veçante në llojin e tij, shënoi edhe përmbylljen e  veprimtarive të shumta që Ministria e Mbrojtjes organizoi dhe zhvilloi në vigjilje të festimit të 100-vjetorit të Pavarësisë dhe krijimit të Forcave të Armatosura.