Ministria e Mbrojtjes - Arkivi 2008-2013

Promovohen vlerat historike të Muzeumit të Forcave të Armatosura

6 dhjetor 2012

Foto Galeri

b_230_153_16777215_00___images_galeria_2012_Dhjetor_6b_5.jpgSot paradite ministri i Mbrojtjes, z. Arben Imami, ka zhvilluar në mjediset e Muzeumit Historik të Forcave të Armatosura, një takim me gazetarët që mbulojnë kulturën në mediat elektronike dhe në shtypin e shkruar. Ky takim është zhvilluar në formë bashkëbisedimi, ku janë shpalosur vlerat historike që mbart Muzeumi i FA, i cili u përurua në ditën e 100-vjetorit të krijimit të FA Shqiptare. Duke marrë fjalën në këtë takim, ministri i Mbrojtjes, z. Arben Imami, theksoi se, qëllimi i këtij takimi me median është prezantimi i muzeumit të ri të Forcave të Armatosura, i objekteve dhe vlerave që ai përcjell.

Me këtë rast, z. Imami ka shprehur edhe njëherë një falënderim të veçantë për të gjithë ata që kontribuan në ideimin dhe ndërtimin e këtij muzeumi. “Muzeumi i FA ka një konceptim të veçantë, dhe kjo është shumë e rëndësishme. Ky nuk është një muze historik, që tregon sesi është krijuar një forcë apo dega e një force, - është shprehur z. Imami. Në pavijonin e parë, nëpërmjet eksponateve që kanë një vlerë të jashtëzakonshme, si pisqollat, pushkët e vjetra, topat e vjetër, gjylet etj, krijohet një përfytyrim i artizanatit shqiptar në këtë fushë, dhe gjithashtu tregohet një histori e armatimit që është përdorur në trevat shqiptare për qindra vjet”.

Më tej, ministri Imami është ndalur në pavijonin ku janë ekspozuar flamujt shqiptarë, të mbajtur në momente të rëndësishme të historisë së popullit tonë, po ashtu edhe flamuj që i përkasin ushtrisë së organizuar shqiptare në vitet ‘20. Ndërsa duke folur për pavijonin e periudhës 1945-1990, ministri Imami nënvizoi se, ai është një pavijon që do të sjellë frymën e epokës, që nuk jep një ekzibicion përfundimtar, por janë bërë përpjekje që eksponatet të paraqesin jetën e zakonshme të ushtarit shqiptar, por edhe të qytetarëve të asaj kohe.
Muzeumi i Forcave të Armatosura, tha në fund të fjalës së tij ministri Imami, është miratuar nga Ministria e Kulturës institucionalisht, dhe për ne është shumë e rëndësishme që të bëjmë çdo përpjekje që këtë muze ta bëjmë të aksesueshëm për publikun, që ai të njihet me gjithçka kemi paraqitur në pavijonet dhe eksponatet e tij.

Ndërsa, drejtori i Përgjithshëm i Arkivave dhe Muzeumeve të FA, gjeneral brigade në rezervë Agim Lala, në fjalën e tij u shpreh se, ëndrra për të ndërtuar këtë muze është një ëndërr e vjetër për të gjithë ushtarakët shqiptar, dhe tashmë ajo u bë realitet. Më tej, z. Lala u ka bërë një apel të gjithë ushtarakëve, si edhe familjeve shqiptare që ruajnë relike, që nga uniformat e ndryshme, armatime, pajisje, grada të viteve para 1966, që janë përdorur nga ushtria shqiptare, të dhurohen për muzeun e ushtrisë, dhe ne u shpreh ai, do të vendosim emrin e dhuruesit pranë këtyre relikeve. Gjithashtu, në këtë takim kanë përshëndetur edhe kuratorët e këtij muzeumi, Genc Përmeti dhe Ardian Isufi.

Më pas të pranishmit vizituan pavijonet dhe hapësirat, brenda dhe jashtë muzeut, ku ekspozohen armatime dhe objekte të tjera ushtarake në vite. Me këtë rast, gazetarëve të pranishëm në këtë takim iu shpërndanë edhe tre botimet e reja, që Ministria e Mbrojtjes ka promovuar me rastin e 100- vjetorit të shpalljes së Pavarësisë dhe krijimit të Forcave të Armatosura (Albumin fotografik, “Fillimet e Pavarësisë 1910-1912”, “Dëshmorët e Atdheut”, “100 vjet Këngë, Himne dhe Marshe Patriotike).

Muzeumi i Forcave të Armatosura është konceptuar nga një grup i veçantë pune, me përfaqësues nga Forcat e Armatosura, Instituti i Historisë, nga historian ushtarakë dhe specialistë të tjerë të kësaj fushe. Ndërtimi i tij filloi në qershorin e vitit 2012 dhe erdhi i përfunduar pikërisht në ditën e 100-vjetorit të krijimit të Forcave të Armatosura. Muzeu përbëhet nga dy pavijone kryesore: pavijoni i epokës historike 1470-1945 dhe pavijoni i viteve 1945-1990. Në këtë muze, zë një vend të veçantë ekspozita e flamujve shqiptar në vitet 1912-1924, ndërsa në katin e dytë të tij, paraqiten pjesë nga uniformat e përdorura në vite nga FA, si dhe uniformat më të reja, të cilat paraqiten në manekinë. Është krijuar një dhomë e veçantë për periudhën e Skënderbeut, ku janë paraqitur disa nga betejat që ai ka zhvilluar kundër ushtrisë osmane, si dhe janë armatime të kësaj periudhe.

Ndërkaq, në mjediset e jashtme të muzeut janë ekspozuar armë dhe teknikë luftarake që janë përdorur në vite, duke përfshirë edhe avionë, helikopterë, tanke, maket katërsiluruesi, artileri tokësore, kundërajrore të kalibrave të ndryshëm, si dhe mjete transporti të tipave të ndryshme. Në ndërtimin e këtij muzeu, një ndihmë të veçantë kanë dhënë përfaqësues nga Akademia e Arteve që janë marrë me arredimin e brendshëm të muzeut, si dhe ish-ushtarakë të vjetër, veteranë, restaurues, mjeshtër armësh etj. Në këtë muze janë ekspozuar rreth 280 objekte muzeale, trofe dhe relike të ndryshme, duke filluar që nga shpata, topuzë, gjyle topi prej guri, pushkë të vjetra , etj.