Ministria e Mbrojtjes - Arkivi 2008-2013

Ministri i Mbrojtjes Imami në përurimin e objekteve artistike në Shkodër

24 nëntor 2012

Foto Galeri

b_230_153_16777215_00___images_galeria_2012_Nentor_24_9-2.jpgNë kuadër të 100-vjetorit të Pavarësisë së Shqipërisë dhe krijimit të FA Shqiptare, sot paradite, Ministria e Mbrojtjes në bashkëpunim me bashkinë e qytetit të Shkodrës zhvilluan aktivitetin për projektin “Në shërbim të hapësirave publike”. Ky projekt është mbështetur nga Pen State University, New York Academy of Arts, Ministria e Mbrojtjes dhe Bashkia Shkodër.
Të pranishëm në këtë aktivitet ishin: kryetarja e Kuvendit të Shqipërisë, znj. Jozefina Topalli, ministri i Mbrojtjes, z. Arben Imami, kryetari i bashkisë Shkodër, z. Lorenc Luka, prefektja e qarkut, znj. Voltana Ademi, zëvendësministri i Mbrojtjes, z. Ekrem Spahiu, përfaqësues nga zyra e OSBE, deputetë, gjeneralë, si dhe shumë banorë të qytetit të Shkodrës.

Aktiviteti ka nisur në sheshin para bashkisë së qytetit, ku pas ekzekutimit nga Orkestra Frymore e FA të Himnit Kombëtar të Shqipërisë, fjalën e hapjes e mbajti kryetari i bashkisë, z. Lorenc Luka.
Ministri Imami, duke marrë fjalën në këtë ceremoni u shpreh: “Në verën e vitit 2010 filloi kjo punë. Punët e mira duan kohë dhe mendoj se i kemi kushtuar kohën, mundin, dedikimin e një grupi shumë më të madh njerëzish sesa janë rreshtuar këtu sot. Njerëz që kanë punuar me përkushtim , inteligjencë, talent dhe kreativitet të lartë”. Procesi i demontimit të municioneve në mesin e vitit 2012 ishte i sigurtë, që do të shkonte me atë ritëm drejt fundit në vitin 2013, dhe po mendonim: “Mirë që po shkatërrojmë, po a do të jemi të aftë të tregojmë që FA tona të mund të ndërtojnë mbi shkatërrimin? A mundet që mbi predhat e Luftës së Ftohtë të krijohen Lulet e Dritës dhe Paviglioni i Dashurisë për një kohë paqeje, për një kohë lirie? Ne filluam bashkëpunimin me një grup artistësh shqiptarë, si dhe ftuam disa profesorë të universitetit të Pensilvanisë, që erdhën në dimrin e vitit 2010-2011 dhe vendosëm që t’i sjellim në Shkodër. U zgjodh Shkodra për vendosjen e këtyre veprave, sepse është një qytet me tradita dhe shtresa mijëvjeçare kulturore. “E sollëm në Shkodër për të bërë pikërisht këtë ballafaqim të lashtësisë së kësaj kryeqendre mijëvjeçare të shqiptarëve dhe të ilirëve me një vepër moderne. Prandaj dhe unë jam shumë i lumtur që kjo bëhet në Shkodër. Jam i lumtur sepse i gjithë serioziteti, përkushtimi, talenti i kryetarit të bashkisë, z. Luka, i Këshillit Bashkiak dhe i qytetarëve të Shkodrës është për ta ruajtur këtë qytet të bukur dhe të mrekullueshëm. Për këtë patëm mbështetjen e plotë të deputetëve shkodranë dhe personalisht  të znj. Topalli për çka edhe ju falënderoj” - është shprehur ministri Imami.
Në fund të fjalës së tij, z. Imami falënderoi të gjithë ata që morën pjesë në këtë punë të madhe, veçanërisht përfaqësuesin e OSBE në Tiranë, për të gjithë mbështetjen që ka dhënë për realizimin e këtyre veprave artistike me pjesë nga predhat e mortajave që u demontuan. Gjithashtu, ai ka falënderuar SHBA, për gjithë mbështetjen që i kanë dhënë procesit të demontimit të municioneve të tepërta dhe në veçanti për realizimin e kësaj vepre, e cila, siç theksoi z. Imami, është një vepër e përbashkët e pedagogëve dhe artistëve të universitetit të Pensilvanisë dhe Akademisë së Arteve të Bukura këtu në vendin tonë.

Kryetarja e Kuvendit, znj. Jozefina Topalli, në fillim të fjalës së saj falënderoi në mënyrë të veçantë ministrin e Mbrojtjes, z. Arben Imami për këtë dhuratë që i kanë bërë Shkodrës në këtë 100-vjetor të Pavarësisë. Çdo vepër arti është e bukur, është një vlerë më shumë, tha znj. Topalli, por shndërrimi i armëve të shkatërrimit në vepra arti është diçka shumë e veçantë. Prandaj , një falënderim shumë i sinqertë i shkon artistëve që kanë punuar me aq dashuri dhe pasion për të bërë një vepër të tillë. Më pas, znj. Jozefina Topalli ka nënvizuar vlerat e Shkodrës, duke theksuar se ky qytet ka lindur për të bërë art, ky qytet jeton për artin dhe ka lindur artin. Shkodra ka nxjerrë njerëzit më të mëdhenj të historisë, luftëtarë, ideologë, njerëz të mëdhenj të muzikës, kulturës, sportit, letërsisë, artit, fotografisë, është shprehur ndër të tjera ajo.
Më pas, kryetarja e Kuvendit, znj. Topalli, ministri Imami dhe kryetari Bashkisë prenë shiritin e përurimit të veprës artistike “Lulet e Dritës” e vendosur në lulishten para bashkisë së qyteti, si dhe vizituan edhe veprën tjetër “Paviglioni i Dashurisë”, e cila ishte vendosur në krah të bashkisë. Në fund, znj. Topalli dhe z. Imami, të shoqëruar nga kryetari i bashkisë dhe mjaft qytetarë të Shkodrës, bënë një shëtitje  përgjatë gjithë bulevardit kryesor të qytetit të kthyer tashmë në një pedonale.

Veprat artistike, që u përuruan sot në qytetin e Shkodrës, janë pjesë e projektit “Në shërbim të hapësirave publike”. Ato u konceptuan nga artistë të njohur amerikanë: prof. John Bowman, prof. Ann Sholstrom, prof. Ward Shelley dhe Helen O’Leary, në bashkëpunim me një grup artistësh shqiptarë dhe nën kujdesin e posaçëm të ministrit të Mbrojtjes, z. Arben Imami. Këto vepra janë realizuar me materialet e nxjerra nga procesi i demontimit të municioneve të tepërta, duke qenë jo vetëm vepra të mrekullueshme arti dhe me funksion urban për qytetin e Shkodrës, por duke mbartur një metaforë të madhe, atë të kapërcimit të epokave. Ato janë dëshmi e faktit se, Shqipëria po le pas trashëgiminë e Luftës së Ftohtë duke u bërë vendi i parë i ish-bllokut komunist, që në vitin 2013 çlirohet përfundimisht nga mbetjet e së shkuarës.  
Për vendosjen e këtyre veprave artistike, një kontribut të veçantë kanë dhënë FA, ku u angazhuan 20 forca dhe pesë mjete nga Brigada e Mbështetjes Rajonale dhe 20 forca të Batalionit të Këmbësorisë Malore të Vaut të Dejës.