Ministria e Mbrojtjes - Arkivi 2008-2013

Ministri i Mbrojtjes Imami përuroi bustin e Ismail Qemalit në Kaninë

25 nëntor 2012

Foto Galeri

b_230_134_16777215_00___images_galeria_2012_Nentor_25_3.jpgNë kuadër të festimeve që po zhvillohen me rastin e 100-vjetorit të shpalljes së Pavarësisë, u zhvillua sot paradite në Kaninë të Vlorës, aktiviteti “Kanina për Shqipërinë”. Ky aktivitet u realizua nga shoqata  atdhetare-kulturore “Kanina”, në bashkëpunim me intelektualët dhe biznesmenët e kësaj zone. Të pranishëm në këtë aktivitet ishin: ministri i Mbrojtjes z. Arben Imami, kryetari i Bashkisë së Vlorës, z. Shpëtim Gjika, prefekti i Qarkut Vlorë, z. Eduard Velçani, kryetari Kontrollit të Lartë të Shtetit, z. Bujar Leskaj, deputetë të Qarkut të Vlorës, eurodeputeti austriak, z. Josef Weidn Holzer, i cili kishte ardhur posaçërisht nga Austria për të marrë pjesë në këtë ceremoni, përfaqësues të familjes Vlora si dhe shumë banorë të kësaj zone.

Gjatë këtij aktiviteti, u inaugurua busti i birit të Kaninës, Ismail Qemalit, i cili është falë kontributit të biznesmenëve dhe intelektualëve të Kaninës. Shiritin e përurimit të bustit të themeluesit të shtetit shqiptar, e preu ministri i Mbrojtjes, z. Arben Imami dhe biznesmeni nga Kanina, Gazmir Bega. Mbas fjalës së hapjes që mbajti kryetari i Shoqatës “Kanina”, Agaçe Yzeiri, të pranishmit i përshëndeti  ministri Imami.

Ministri Imami falënderoi të gjithë të pranishmit si dhe organizatorët e kësaj ceremonie. “Kanina është qendër dhe destinacioni i madh i historisë tonë. Rrebeshit turk iu përgjigj më së pari Gjergj Arianiti. Ai ishte në krye të të gjithë luftërave arbërore, dhe më pas dhëndri i tij Gjergj Kastrioti, heroi ynë kombëtar, miti dhe simboli ynë, që realizoi në ato 25-vjet luftëra të përgjakshme. Ajo luftë kishte padyshim një bazë dhe kjo bazë e ka pasur qendrën dhe kreun këtu. Nuk mund të ishte ndryshe, që nga një familje e madhe dhe një histori e madhe, të vinte Ismail Qemali në historinë e Shqipërisë. 100-vjetori i Pavarësisë është një ngjarje e shënuar për ne shqiptarët, sepse me të gjithë mundin, përpjekjet, konfliktet dhe luftërat tona, ne arritëm që pas 100-vjetësh të kemi një shtet dhe jo vetëm një shtet shqiptarë, por dy shtete, që është Republika e Kosovës dhe të jemi më të lirë se kurrë në historinë tonë’’.

Me tej, ministri Imami duke folur për vlerat dhe kontributin e Ismail Qemalit theksoi se: “Ismail Qemali është figura më e ndriçuar e 100-vjeçarit të shkuar, por kanë ekzistuar edhe vullnete negative e të liga për të lënë në harresë, për mos të nxjerrë në pah veprën më të madhe të historisë tonë kombëtare, që është Shpallja e Pavarësisë. Ai nuk ishte i vetëm, por ishin paria e Korçës, Shkodrës, Elbasanit, Prizrenit, Prishtinës, ishin trimat luftëtarë. Kjo e bën akoma më të madhe figurën e Ismail Beut, sepse e gjithë paria e Shqipërisë zgjodhi burrin e Kaninës dhe burrin e Vlorës të ngrejë flamurin, shenjën e identitetit tonë të pangatërrueshëm dhe të patjetërsueshëm kombëtarë. “Ismail Bej Vlora është i të gjithë shqiptarëve kudo që janë, në të gjitha territoret tona etnike dhe në mbarë globin. Ka përfunduar ministri i Mbrojtjes, z. Arben Imami

Në përfundim të kësaj veprimtarie, ministrit të Mbrojtjes, z. Arben Imami nga përfaqësuesit e Shoqatës “Kanina”, iu dhurua flamuri i Kaninës.