Ministria e Mbrojtjes - Arkivi 2008-2013

Përurohet ura “Bejli” në komunën Vig-Mnelë

5 shkurt 2013

Foto Galeri

b_230_153_16777215_00___images_galeria_2013_Shkurt_5_3.jpgSot në mesditë, në komunën Vig-Mnelë të qarkut të Shkodrës u zhvillua një ceremoni e veçantë me rastin e përurimit të urës “Bejli” mbi lumin Gjadër. Në këtë ceremoni ishin të pranishëm: zëvendësministri i Mbrojtjes, z. Ekrem Spahiu, shefi i Shtabit të Përgjithshëm i FA, gjeneralmajor Xhemal Gjunkshi, prefektja e qarkut të Shkodrës, znj. Voltana Ademi, kryetari i qarkut të Shkodrës, Maxhid Cungu, komandanti i Brigadës së Mbështetjes Rajonale (BrMR), gjeneral brigade Abaz Lleshi, si dhe mjaft banorë dhe nxënës shkolle të kësaj zone. Fjalën e hapjes e mbajti kryetari i komunës Vig-Mnelë, z. Pjetër Lleshi.

Shefi i Shtabit të Përgjithshëm, gjeneralmajor Xhemal Gjunkshi në përshëndetjen e tij, ndër të tjera, u shpreh: “Është kënaqësi për mua që të marr pjesë në inaugurimin e kësaj ure e cila do të ndikojë në përmirësimin e kushteve të jetesës së banorëve të kësaj zone, të cilët për vite me radhë kanë vuajtur vërshimet e lumit Gjadër”. Më tej, gjeneralmajor Gjunkshi theksoi se, ndërtimi i kësaj ure nga njëra anë tregon rëndësinë që ka për ne si Forca të Armatosura angazhimi në ndihmë të komunitetit, por në të njëjtën kohë, këto projekte janë gjithashtu edhe fryt i bashkëpunimit të shkëlqyer të Forcave të Armatosura me komunitetin, është përmbushja e misionit që kanë FA për t’u ardhur në ndihmë veçanërisht zonave rurale. Ngritja e kësaj ure është realizuar në bashkëpunim dhe koordinim mjaft të mirë mes përfaqësuesve të qarkut të Shkodrës, komunës Vig-Mnelë dhe Brigadës së Mbështetjes Rajonale, duke bërë të mundur ndërtimin e saj në një kohë të shkurtër dhe me cilësi.

Në vijim, gjeneralmajor Gjunkshi nënvizoi: “Forcat e Armatosura, nëpërmjet Batalionit Xhenier të BrMR për një periudhë disa vjeçare kanë ndërtuar me dhjetëra ura të tilla “Bejli” në të katërt anët e vendit, në jug e në veri, duke ndikuar ndjeshëm në përmirësimin e jetës së banorëve. Bashkëpunimi i FA me pushtetin vendor ka qenë dhe do të jetë gjithmonë objekt i vazhdueshëm i punës tonë”. Në përfundim të fjalës së tij, shefi i Shtabit të Përgjithshëm, gjeneralmajor Xhemal Gjunkshi është shprehur se, Forcat e Armatosura edhe në të ardhmen do të jenë gjithmonë pranë komunitetit për të ndihmuar në përmirësimin e infrastrukturës dhe në rast nevojash në përballimin e emergjencave civile. Të pranishmit në këtë ceremoni janë përshëndetur edhe nga kryetari i qarkut të Shkodrës, z. Maxhid Cungu.

Ura “Bejli” e ndërtuar mbi lumin Gjadër lidh jo vetëm fshatin Vig dhe Mnelë të kësaj komune, por edhe banorët e komunës Ungrej të qarkut të Lezhës, si dhe fshatin Kaftall të komunës Qerret të Pukës. Janë mbi 5000 mijë banorë të kësaj zone të thellë malore që tashmë nëpërmjet kësaj ure do të lëvizin lirshëm dhe pa probleme në çdo kohë dhe stinë, sidomos fëmijët dhe nxënësit e shkollës 9-vjeçare, e cila ndodhet në qendër të komunës. Kjo urë është 81 metra e gjatë me tre hapësira drite midis këmbëve të saj dhe e ndërtuar me elementë metalikë. Për ndërtimin e saj, Forcat e Armatosura kanë dhënë një kontribut të veçantë jo vetëm duke dhuruar të gjithë elementët metalikë të urës, por edhe asistencë teknike me specialistë xhenierë të urave “Bejli” dhe mjete teknike.