Ministria e Mbrojtjes - Arkivi 2008-2013

Zhvillohet stërvitje kërkim-shpëtimi në Batalionin e Këmbësorisë në Vaun e Dejës

12 mars 2012

Foto Galeri

b_230_153_16777215_00___images_galeria_2013_Mars_12a_1.jpgGjatë ditës së sotme, në rajonin e Vaut të Dejës në Shkodër u zhvillua një stërvitje kërkim-shpëtimi me pjesëmarrjen e Batalionit të Parë të Këmbësorisë të Forcave Tokësore. Qëllimi i kësaj stërvitjeje ishte aftësimi i personelit të Batalionit të Parë të Këmbësorisë për realizimin e detyrave në operacionet e kërkim-shpëtimit si dhe të emergjencave civile në ndihmë të popullsisë. E veçanta e kësaj stërvitjeje ishte se ajo u realizua në kushte të rënduara atmosferike dhe në një terren tepër të thyer malor, duke synuar testimin e operacionalitetit dhe të aftësive fizike të efektivit të këtij batalioni.

Stërvitja u inspektua nga shefi i Shtabit të Përgjithshëm i FA, gjeneralmajor Xhemal Gjunkshi, i cili i shoqëruar nga zëvendësshefat e Shtabit të Përgjithshëm, gjeneralmajor Viktor Bërdo , gjeneral brigade Sandër Lleshi si dhe nga komandanti i Forcave Tokësore, gjeneralmajor Zyber Dushku ka ndjekur nga afër dinamikën e veprimeve të trupave pjesëmarrëse në këtë stërvitje të rëndësishme.

Në përfundim të stërvitjes, gjeneralmajor Gjunkshi ka përshëndetur të gjithë trupat pjesëmarrëse dhe i ka falënderuar ato edhe në emër të ministrit të Mbrojtjes për disiplinën e lartë, përkushtimin dhe përgatitjen serioze që manifestuan gjatë kësaj stërvitje e cila u zhvillua në kushte të vështira moti dhe terreni. Duke iu drejtuar trupave pjesëmarrëse gjeneralmajor Gjunkshi tha: “Ne jemi këtu për të demonstruar aftësitë profesionale edhe në kushte të tilla atmosferike. Ju keni shërbyer me sukses edhe në misione paqeruajtëse në Afganistan dhe në Bosnje-Hercegovinë. Ju do të inkuadroheni sërish atje ku do të na kërkojë Aleanca, por më të përgatitur dhe më të aftësuar, sepse stërvitje të tilla rrisin më shumë aftësitë tuaja luftarake”.

Më tej, shefi i Shtabit të Përgjithshëm ka falënderuar në mënyrë të veçantë personelin femër pjesëmarrëse në këtë stërvitje, të cilat ashtu si dhe kolegët e tyre meshkuj, manifestuan gatishmëri e përgjegjësi të lartë dhe realizuan me sukses detyrën e vështirë. Gjeneralmajor Gjunkshi ka siguruar edhe njëherë mbështetjen e vijueshme të Shtabit të Përgjithshëm të FA për rritjen e mëtejshme të kapaciteteve operacionale të Batalionit të Parë të Këmbësorisë, i cili për nga vetë natyra dhe misioni i tij realizon detyra të këmbësorisë alpine dhe malore. Në këtë kontekst, ka nënvizuar ai, rëndësi të veçantë do të marrë bashkëpunimi edhe me Forcat e Armatosura të Austrisë për përgatitjen dhe kualifikimin e personelit të këtij batalioni për realizimin e detyrave alpine. Stërvitje të tilla do të shërbejnë në të ardhmen edhe si testime vlerësuese për aftësitë fizike për të gjithë repartet operacionale të FA, ka përfunduar gjeneralmajor Gjunkshi.

Në emër të pjesëmarrësve në stërvitje ka përshëndetur komandanti i Forcave Tokësore, gjeneralmajor Zyber Dushku i cili ka falënderuar shefin e Shtabit të Përgjithshëm për pjesëmarrjen në këtë stërvitje, si dhe për vlerësimet maksimale që ai i bëri angazhimit dhe arritjeve të shënuara nga efektivi i batalionit në këtë stërvitje. Gjithashtu, gjeneral brigade Dushku ka siguruar se stërvitje të tilla në terrene dhe kushte të vështira atmosferike do të jenë objektiv kryesor i punës së reparteve të Forcave Tokësore.