Ministria e Mbrojtjes - Arkivi 2008-2013

Në QKMBM zhvillohet “Dita Botërore e Poezisë”

23 mars 2013

Foto Galeri

b_230_153_16777215_00___images_galeria_2013_Mars_23_09.jpgNë kuadër të 21 marsit “Ditës Botërore të Poezisë” shpallur nga Unesco,  Qendra e Kulturës, Medias dhe Botimeve të Mbrojtjes organizoi një aktivitet të bukur poetik të emërtuar “Dita Botërore e Poezisë”. Holli i madh i QKMBM-së, ku u zhvillua ky aktivitet ishte i mbushur me ushtarakë, familjarë të tyre, fëmijë dhe të ftuar të tjerë. Repertori i këtij aktiviteti poetik ishte përzgjedhur me shumë kujdes nga specialistët e Sektorit të Rekreacionit, duke u mbështetur kryesisht në krijimtarinë letrare të poetëve tanë të shquar: Ismail Kadare, Dritëro Agolli, Odise Grillo, Gjergj Fishta, Pashko Vasa, Fan S. Noli, Zana Myrtezai, Migjeni, Andon Zako Çajupi, Xhevair Spahiu etj.

Poezitë dhe vjershat e përzgjedhura u interpretuan me pasion dhe nivel artistik nga fëmijët e ushtarakëve dhe punonjësve civil të Ministrisë së Mbrojtjes dhe Shtabit të Përgjithshëm të FA-së që ndjekin kursin e aktrimit pranë Qendrës së Kulturës, Medias dhe Botimeve të Mbrojtjes. Gjithashtu të pranishmit në këtë aktivitet vizituan nga afër një fotoekspozittë të poetëve dhe shkrimtarëve të shquar shqiptarë.

21 marsi është Dita Botërore e Poezisë, e shpallur nga UNESCO në vitin 1999, vendim i marrë në Kongresin e 30-të të kësaj agjencie, zhvilluar në Paris. Përveç krijimit të një dite të veçantë në nderim të poezisë dhe krijimtarisë poetike, qëllimi i Ditës Botërore të Poezisë është përkrahja e leximit të poezisë, nxitja e krijimtarisë poetike, botimi i saj si dhe krijimi i një atmosfere mikëpritëse për praninë poetike kudo në botë. Dita e Poezisë dëshmohet se ka qenë e pranishme që prej vitit 1505. Ajo është kujtuar në muaj të ndryshëm të vitit dhe në forma të larmishme organizimi, sipas veçorive, besimeve dhe parapëlqimeve të secilit komb. Poezia lejon individët, si dhe të gjithë shoqëritë  të zbulojnë dhe të pohojnë identitetin e tyre. Arti i poezisë është themeli i diversitetit, duke lejuar gjuhë të ndryshme  të shprehin  zërin e tyre në mes të komunitetit të kombeve. Duke lehtësuar dialogun, poezia inkurajon tolerancën dhe respektin. Poezia është shtyllë e traditës gojore dhe mund të komunikojë thellë vlerat e kulturave të ndryshme përgjatë shekujve.