Ministria e Mbrojtjes - Arkivi 2008-2013

Ministri i Mbrojtjes Imami priti atasheun ushtarak të Rumanisë

27 mars 2013

b_230_153_16777215_00___images_homepage_imami_atashehu27032013.jpgSot paradite, ministri i Mbrojtjes, z. Arben Imami, priti në takim nënkolonel Laurentiu Rusan, i cili sapo ka nisur detyrën e atasheut ushtarak të Republikës së Rumanisë në Tiranë. Në këtë takim ishte i pranishëm edhe kolonel Daniel Plescan, i cili përfundoi detyrën si atashe ushtarak i Rumanisë në vendin tonë. Ministri i Mbrojtjes, z. Arben Imami, pasi ka uruar nënkolonel Laurentiu Rusan për detyrën e re si atashe ushtarak i Republikës së Rumanisë në vendin tonë, ka vlerësuar marrëdhëniet historike midis dy vendeve dhe dy popujve tanë, të cilët jetojnë prej mijëra vitesh në gadishullin e Ballkanit, rajon i cili, sipas z. Imami, sot më tepër se kurrë njeh paqe dhe stabilitet dhe i ka të hapura mundësitë e zhvillimit dhe të prosperitetit.

Gjithashtu, ministri Imami vlerësoi bashkëpunimin në fushën ushtarake midis dy vendeve dhe ushtrive tona dhe shprehu bindjen e tij se ky bashkëpunim do të rritet e forcohet më tej në të ardhmen, si dy vende që tashmë janë anëtarë të NATO. Më tej, ministri Imami vlerësoi punën dhe kontributin e kolonel Daniel Plescan, si atashe ushtarak prej më se katër vitesh në vendin, por edhe si dekan i atasheve ushtarakë në vendin tonë në këto vitet e fundit, rol të cilin e ka luajtur në mënyrë të shkëlqyer. Para pak kohësh, ministri i Mbrojtjes Imami e ka dekoruar kolonel Plescan me medaljen “Për Shërbime të Shquara”, me motivacionin: “Për kontributin e dhënë nëpërmjet punës së tij si atashe ushtarak, në drejtim të forcimit të marrëdhënieve dhe bashkëpunimit dypalësh në fushën e mbrojtjes, midis Republikës së Shqipërisë dhe Republikës së Rumanisë”.