Ministria e Mbrojtjes - Arkivi 2008-2013

“Pranverë ngjyrash”në Qendrën e Kulturës, Medias dhe Botimeve të Mbrojtjes (QKMBM)

30 mars 2013

Foto Galeri

b_230_153_16777215_00___images_galeria_2013_Prill_1_1.jpgDitën e shtunë, më 30 mars, në zbatim të kalendarit vjetor së aktiviteteve të artit, kulturës dhe trashëgimisë për vitin 2013, Drejtoria e Aktiviteteve dhe Marrëdhënieve me Komunitetin pranë Qendrës së Kulturës, Medias dhe Botimeve të Mbrojtjes, organizoi aktivitetin “Pranverë ngjyrash në QKMBM”. Ky aktivitet u organizua në ambientet e hapura të QKMBM me një skenë të improvizuar dhe mjaft origjinale.  Ambienti i hapur i QKMBM ku u zhvillua ky aktivitet ishte i mbushur plot e përplot me fëmijët e ushtarakëve, punonjësve civilë në Ministrinë e Mbrojtjes dhe Shtabit të Përgjithshëm së Forcave të Armatosura, familjarë të tyre dhe të ftuar të tjerë, të cilët e ndoqën me mjaft interes këtë organizim mjaft të veçantë dhe argëtues.

Për realizimin e këtij aktiviteti punuan me përkushtim mjaft të veçantë, z. Arben Muça, përgjegjës i Sek. të Rekreacionit, znj. Natasha Sela, specialiste e aktrimit, Ilir Xhaxhiu, specialist pikture, Ervin Bushati, specialist kënge, Redon Makashi, specialist kitare, Mira Bregu, specialiste e marrëdhënieve me komunitetin, Artemisa Çullhaj, specialiste e koordinimit të aktiviteteve, Jorida Duro, specialiste e marrëdhënieve me komunitetin dhe Lorenca Gjonaj, specialiste baleti. Në këtë aktivitet performuan fëmijët e kurseve të pikturës, aktrimit, këngës, kitarës dhe baletit pranë Qendrës Rekreative.

Në hapje të këtij aktiviteti, fëmijët e kursit të pikturës në bashkëpunim me Qendrën Rajonale të Mjedisit, pikturuan logo të ndryshme në telajo, çanta, bluza, tullumbace, etj, rreth temës: “Ta duam e ta mbrojmë natyrën”. Më pas u zhvillua një program artistik me këngë, recitime, pjesë në kitarë dhe balet me fëmijët e kurseve të Qendrës Rekreative. Në vijim u zhvilluan gara me biçikleta, u ngritën tullumbace, u krijuan punime të ndryshme me mjete të riciklueshme, në bashkëpunim me Qendrën Rajonale të Mjedisit dhe Drejtorinë e Politikave së Mjedisit të Bashkisë së Tiranës.

Gjatë performimeve të ndryshme, u bë thirrje për sensibilizimin e fëmijëve dhe familjarëve të ushtarakëve e punonjësve civilë në Ministrinë e Mbrojtjes dhe Shtabit të Përgjithshëm së Forcave të Armatosura, për pastrimin e territorit, mbledhjen e mbeturinave dhe seleksionimin e tyre në vende të veçanta, të ngritura posaçërisht në ambientet e QKMBM. Fëmijëve pjesëmarrës në këtë aktivitet iu dhuruan kapele dhe bluza. Rritja e theksuar e gamës dhe e sasisë së artikujve të konsumit të përditshëm e të mallrave ushqimore të importuara, ka bërë që të rritet në mënyrë të theksuar edhe sasia e mbeturinave nga këto produkte, veçanërisht nga ambalazhet prej qelqi, lëndësh plastike, kartoni e metali. Riciklimi është procesi i ripërpunimit të mbeturinave. Kohët e fundit ky proces ka një zhvillim të gjerë në shumë fusha industriale: të hekurit, drurit, plastikës, qelqit.   

Për ta bërë sa më të thjeshtë ripërfitimin e materialeve të riciklueshme është vënë në funksion grumbullimi i diferencuar i mbeturinave në kontenitorët përkatës: letër, qelq, plastikë apo mbetjet e njoma (që janë mbetjet ushqimore). Riciklimi i mbeturinave ndihmon planetin tonë. Grumbullimi i mbeturinave sjell një mjedis më të pastër për ne e fëmijët tanë, ndërsa riciklimi i tyre mbron burimet e pasuritë natyrore që të mos shteren kurrë.   

Ripërdorimi, reduktimi, riciklimi janë 3 fjalët më të rëndësishme që ndihmojnë natyrën dhe mjedisin ku jetojmë. Riciklimi bëhet i mundur falë ndihmës tonë. Jemi ne ata që duhet të diferencojmë fillimisht mbeturinat që prodhojmë. Për të bërë një grumbullim të diferencuar sa më efektiv, është e rëndësishme të njohim cilat janë materialet e riciklueshme dhe si duhet t’i ndajmë ato. Sektori i Rekreacionit, me anë të këtij aktiviteti, përcolli bukur një mesazh të qartë tek të pranishmit se “Mbrojtja e natyrës dhe e mjedisit konsiderohet si pjesa më e rëndësishme e jetës në planetin tonë”.