Ministria e Mbrojtjes - Arkivi 2008-2013

Organizohet në QKMBM aktiviteti “Banda muzikore “Vatra”, bërthama e lindjes së OFKFA”

11 prill 2013

Foto Galeri

b_230_153_16777215_00___images_galeria_2013_Prill_11_5.jpgNë zbatim të kalendarit vjetor të aktiviteteve të artit, kulturës dhe trashëgimisë për  vitin 2013, në sallën e madhe të Qendrës së Kulturës, Medias dhe Botimeve të Mbrojtjes, u zhvillua aktiviteti “Banda muzikore “Vatra”, bërthama e lindjes së Orkestrës Frymore Kombëtare të Forcave të Armatosura”. Ky aktivitet u organizua nga QKMBM në bashkëpunim me Federatën “Vatra”, Amerikë dhe kishte për qëllim nxjerrjen në pah të rëndësisë dhe vlerave që ka krijimi i bandës “Vatra” si pararendëse e Bandës Kombëtare të Shtetit Shqiptar dhe Orkestrës Frymore të Forcave të Armatosura të Shqipërisë. Të pranishëm në këtë aktivitet ishin: zëvendësministrja e Mbrojtjes, znj. Arta Musaraj, familjarë dhe të afërm të themeluesit të bandës “Vatra”, Thomas Nassi, ushtarakë të Forcave të Armatosura, punonjës të Ministrisë së Mbrojtjes dhe QKMBM, si dhe të ftuar të tjerë.

Fillimisht të pranishmit vizituan një ekspozitë me fotografi nga veprimtaria e bandës muzikore “Vatra” dhe bandave muzikore në Shqipëri ekspozuar në hollin e QKMBM. Më pas pjesëmarrësit në këtë aktivitet, të mbledhur në sallën e madhe të QKMBM, dëgjuan përshëndetjen e dërguar enkas për këtë rast nga kryetari i federatës “Vatra” në Amerikë, Dr. Gjon Buçaj.
Në këtë aktivitet përshëndeti mbesa e themeluesit dhe drejtuesit të bandës “Vatra”, Thomas Nassi, znj. Shpresa Stefani-Nassi, në emër të familjarëve dhe shoqatës “Dardha”. Më pas veprimtaria ka vijuar me disa kumtesa si: Atdhetarizmin e tyre ata e shprehën me muzikë, mbajtur nga  Prof. Efthim Dodona; Flamuri i bandës “Vatra”, nga z. Frederik Stamati; Qesen dhe shpirtin për shpëtimin e Shqipërisë, kushtuar bandës “Vatra”, nga  z. Koço Gjipali; Uniforma e një luftëtari të Trupit Vullnetar, nga znj. Ariola Prifti.

Në fund të ceremonisë, zëvendësministrja e Mbrojtjes, znj. Arta Musaraj, i dorëzoi znj. Shpresa Stefani-Nassi medaljen “Për shërbime të shquara” që ministri i Mbrojtjes, z. Arben Imami, i akordoi pas vdekjes themeluesit të bandës muzikore “Vatra”, Thomas Nassi, me këtë motivacion: “Për kontributin e jashtëzakonshëm të dhënë në Luftën e Vlorës në vitin 1920 dhe për krijimin e Bandës Kombëtare të Shtetit Shqiptar, që më pas do të quhej Orkestra Frymore Kombëtare e Forcave të Armatosura”. Gjithashtu zëvendësministrja Musaraj i dorëzoi drejtorit artistik të Orkestrës Frymore Kombëtare të FA, z. Arben Muça dhe komandantit të kësaj orkestre, nëntoger Altin Babameto, medaljen “Për shërbime të shquara” akorduar nga ministri i Mbrojtjes për bandën muzikore “Vatra” me motivacion: “Për kontributin e jashtëzakonshëm dhënë në Luftën e Vlorës, për gjallërimin e jetës artistike muzikore në Shqipërinë e viteve 1920-1925 dhe për kontributin e anëtarëve të saj si bashkëthemelues të Orkestrës Frymore Kombëtare të Shtetit Shqiptar, sot Orkestra Frymore Kombëtare e Forcave të Armatosura”.
Aktiviteti “Banda muzikore “Vatra”, bërthama e lindjes së Orkestrës Frymore Kombëtare të Forcave të Armatosura” u mbyll me një mini-koncert të Orkestrës Frymore Kombëtare të Forcave të Armatosura, i cili u dha në ambientet e hapura të QKMBM.