Ministria e Mbrojtjes - Arkivi 2008-2013

“Dita Botërore e Librit”

23 prill 2013

Foto Galeri

b_230_153_16777215_00___images_galeria_kulture_23_prill_13_a8.jpgNë Bibliotekën e Akademisë së Forcave të Armatosura në KDS, Qendra e Librit dhe Mbështetjes me Informacion, në bashkëpunim me Drejtorinë e Aktiviteteve dhe Marrëdhënieve me Komunitetin në Qendrën e Kulturës, Medias dhe Botimeve të Mbrojtjes dhe Drejtorinë e J9 në Shtabin e Përgjithshëm të Forcave së Armatosura të Republikës së Shqipërisë, organizuan me rastin e 23 prillit, aktivitetin “Dita Botërore e Librit”. Qëllimi i aktivitetit ishte nxjerrja në pah dhe rëndësia e librit në edukimin e ushtarakut. Të pranishëm në këtë aktivitet ishin kolonel Agim Sula, komandant i Akademisë së Forcave të Armatosura, zëvendëskomandanti i KDS, kolonel Ded Prenga, akademikë, profesorë, mjaft punonjës civilë e ushtarakë të institucioneve organizatore të këtij aktiviteti si dhe shumë të ftuar të tjerë që e duan dhe e respektojnë librin.

Moderatorja e këtij aktiviteti, znj. Mira Bregu foli për rëndësinë e datës 23 prill. Në fjalën e saj, duke falënderuar të gjithë të pranishmit, ajo tha: “Kjo është dita botërore e librit, e promovuar prej disa vitesh nga UNESCO dhe është dita e vdekjes së Servantesit dhe Shekspirit. Pra e dy kolosëve të mëdhenj së letërsisë botërore dhe këto data kanë rastisur për të kujtuar e mos harruar kurrë librin. Ne jemi mbledhur sot në Bibliotekën e Akademisë së Forcave të Armatosura, në këtë ambient kaq të këndshëm, që i fton lexuesit të ndjejnë erën e librit, që ka kohë që ka munguar, për të ftuar sa më shumë njerëz që ta duan e respektojnë librin dhe me këtë rast falënderoj drejtorin, profesorin dhe akademikun, z. Bernard Zotaj për bashkëpunimin e tij ”. Më pas, prof. dr. Bernard Zotaj, pasi përshëndeti të gjithë të ftuarit u shpreh rreth rëndësisë së librit në radhët e FA.

Në vijim të aktivitetit, shefja e bibliotekës, znj. Nafije Lala, u shpreh për rolin e bibliotekës në Forcat e Armatosura. Gjithashtu, ajo prezantoi referimet nga personalitete dhe njohës të stendave, duke filluar me stendën e librit historik, Dilaver Goxhaj; mësimor, proletar Hasani; ushtarak, Kostaq Karoli; letrar, Agron Agolli; autorë të rinj, Bruxhilda Kito. Në stendën e librit historik ishte paraqitur në italisht libri që kishte të bënte me Luftën e Pavarësisë së Italisë, që daton nga viti 1854. Në stendë u paraqitën shumë kopje të vetme së viteve të ndryshme të këtij libri. Gjithashtu u ekspozuan libra për gramatikën e popullit shqiptar, për historinë e Shqipërisë dhe të gjithë Ballkanit në përgjithësi. Më pas, u prezantua koleksioni i periodikut, që daton nga viti 1992, libra për mbrojtjen e atdheut, studime filologjike, gazeta “Ushtria”, e gjitha e lidhur dhe e kompletuar. I gjithë periodiku ndodhet në bibliotekë që nga viti 1948, si revista ashtu edhe gazeta. Në stendën tjetër, duke qenë bibliotekë akademike që i shërben procesit mësimor, i cili është drejtimi kryesor, ishin paraqitur botime në grup leksionesh të të gjithë pedagogëve. Gjithashtu, kishte të ekspozuar libra nga arti ushtarak, guidë politike dhe strategjike dhe mënyra se si i shërbejnë ato procesit mësimor. Në stendën pasardhëse ishin vendosur librat e dhuruar ku përfshihej kryesisht lufta e Kosovës.

Autorët, Agron Agolli, Dilaver Goxhaj, Granit Zela dhe Bruxhilda Kito dhuruan librat e tyre për bibliotekën e AFA si dhe më pas në këtë aktivitet pati disa lexime autorësh mjaft të bukura.
Në mbyllje të këtij aktiviteti, zëvendëskomandanti i KDS, Ded Prenga, bëri përshëndetjen e tij si dhe shpërndau certifikata mirënjohjeje në emër të komandantit të KDS, gjeneral brigade Bardhyl Hoxha për Dilaver Goxhaj dhe Agron Agollin.