Ministria e Mbrojtjes - Arkivi 2008-2013

Niset me mision në Afganistan kontingjenti “Eagle-7”

24 korrik 2013

Foto Galeri

b_230_154_16777215_00___images_galeria_2013_Korrik_24a_4.JPGNë Batalionin e Forcave Speciale në Zall-Herr u zhvillua ceremonia e nisjes së kontingjentit “Eagle-7” mision “COMBAT” në Kandahar, Afganistan, i cili përbëhet nga 50 trupa të kompanisë së Aksioneve Speciale Ajrore. Të pranishëm në këtë ceremoni ishin: shefi i Shtabit të Përgjithshëm i FA, gjeneralmajor Xhemal Gjunkshi, komandanti i Forcës Tokësore, gjeneralmajor Zyber Dushku, atasheu ushtarak i SHBA në vendin tonë, Glenn Brown, gjeneralë, drejtorë dhe ushtarakë të tjerë të lartë të Ministrisë së Mbrojtjes dhe Shtabit të Përgjithshëm, familjarë dhe të afërm të pjesëtarëve të kontingjentit “Eagle-7” , etj. Pas fjalës së hapjes që mbajti komandanti i Forcës Tokësore, gjeneralmajor Zyber Dushku, të pranishmit në ceremoni i përshëndeti shefi i Shtabit të Përgjithshëm i FA, gjeneralmajor Xhemal Gjunkshi.

Duke iu drejtuar trupave paqeruajtëse, gjeneralmajor Gjunkshi u shpreh: “Ndodhemi sot në një moment shumë solemn, ku është bërë traditë që nga ky shesh simbol i “burrërisë dhe trimërisë” t’ju përcjellim me nderime dhe respekt! Ju jeni përgatitur dhe do të niseni me mision në operacionin ushtarak ISAF të drejtuar nga NATO, në Afganistan. Pas gjashtë misioneve të tjera pararendëse, ju keni sot 6 herë më shumë përvojë nga rezultatet dhe mësimet e nxjerra. Ju me profesionalizmin e treguar në të gjitha misionet jeni krenaria e FARSH, ju do të shërbeni për 6 muajt e ardhshëm në operacionin e drejtuar nga NATO, në Afganistan, ku do të gjeni një përvojë të vyer dhe gjurmët më të mira të mundshme që kanë përcjellë kolegët dhe shokët tuaj, ushtarakë nga Forcat e Armatosura të Republikës së Shqipërisë dhe atyre të vendeve partnere, veçanërisht SHBA”.

Më tej, gjeneralmajor Gjunkshi, duke vlerësuar këtë mision si një obligim të madh, më madhorin obligim të ushtarakut shqiptar, u ka kërkuar paqeruajtësve të ruajnë nivelin e arritur deri më sot dhe të punojnë për t’i çuar ato më lartë. “Ju jeni ambasadorë të Shqipërisë në Afganistanin e largët. Ju jeni figura dhe personifikimi i atdheut, ju jeni mbajtësit më dinjitozë të flamurit tonë kombëtar. Ju jeni shokët e komandant Feti Voglit, dëshmorit tonë që i shërbeu misionit deri në vetëmohim. Për të gjitha këto arsye, ju duhet të jeni shumëfish të kujdesshëm dhe po kaq dinjitozë”, - është shprehur gjeneralmajor Gjunkshi. Në përfundim të ceremonisë, shefi i Shtabit të Përgjithshëm i FA, gjeneralmajor Xhemal Gjunkshi, i dorëzoi flamurin kombëtar, komandantit të kontingjentit “Eagle-7”, major Pali Dakolli.

Kontingjenti “Eagle-7” i Batalionit të Forcave Speciale ka zhvilluar stërvitje të përbashkëta “Combinet”, “Joint” dhe “Excange”, me Forcat Speciale Amerikane në kuadrin e shkëmbimit të eksperiencës. Stërvitja paradislokuese e këtij kontingjenti është zhvilluar 14 javë nga instruktorë të Batalionit të Forcave Speciale në rajonin e Zall-Herrit. Efektivat janë të kompanisë së Aksioneve Speciale Ajrore, e cila shkon në këtë mision për të dytën herë. Gjatë trajnimit, kontingjenti “Eagle-7” iu nënshtrua Kursit të Avancuar të Operacioneve Speciale. Efektivi është trajnuar gjithashtu për çështje të operacionalitetit, zbulimit, ndërlidhjes, xhenios, shëndetësisë, armatimit, etj. Ai është inspektuar dhe monitoruar nga ekipe të Shtabit të Përgjithshëm të FA dhe Forcës Tokësore. Batalioni i Forcave Speciale ka kontribuar në misione në Bosnje dhe Hercegovinë, Irak, Afganistan, Çad, etj.