Ministria e Mbrojtjes - Arkivi 2008-2013

Ministri i Mbrojtjes Imami priti shefin e Shtabit të Mbrojtjes së Italisë

26 korrik 2013

Foto Galeri

b_220_147_16777215_00___images_galeria_2013_Korrik_26_5.jpgSot paradite, ministri i Mbrojtjes, z. Arben Imami, priti në një takim të veçantë shefin e Shtabit të Mbrojtjes të Republikës së Italisë, admiral Luigi Binelli Mantelli, i cili në krye të një delegacioni të nivelit të lartë ushtarak italian po bën një vizitë zyrtare në vendin tonë. Qëllimi i kësaj vizite është forcimi i bashkëpunimit në fushën e mbrojtjes midis dy vendeve tona fqinje, si edhe pjesëmarrja në ceremoninë e mbylljes me sukses të plotë të misionit të Delegacionit Italian të Ekspertëve në vendin tonë. Në këtë takim ishe i pranishëm edhe shefi i Shtabit të Përgjithshëm, gjeneralmajor Xhemal Gjunkshi dhe ambasadori i Republikës së Italisë në Tiranë, z. Massimo Gaiani.

Ministri i Mbrojtjes Imami, pasi i uroi mirëseardhjen në Tiranë, admiral Luigi Binelli Mantellit dhe delegacionit të lartë ushtarak italian, ka vlerësuar nivelin e lartë të marrëdhënieve midis dy vendeve tona dhe ka theksuar se jemi të vendosur të vazhdojmë në këtë rrugë duke ruajtur dimensionin europian. “Këto 20 vjet, ka nënvizuar Imami, Shqipëria ka bërë gjithçka për paqen, duke krijuar marrëdhënie shumë të mira me vendet anëtare të NATO dhe vendet partnere. Edhe pse tranzicioni ka qenë i vështirë ne vendosëm të bëjmë një ndryshim për Forcat e Armatosura, duke i dhënë një pamje të re atyre si dhe duke i modernizuar ato”. Në muajin shtator, ka nënvizuar z. Imami, do të jemi në opozitë, duke vazhduar kontributin tonë për progresin e mëtejshëm të vendit.

Vend të veçantë në këtë takim iu kushtua bashkëpunimit në fushën e mbrojtjes, bashkëpunim i cili u fuqizua sidomos me vendosjen në vendin tonë të Delegacionit Italian të Ekspertëve në vitin 1997. Ministri Imami ka vlerësuar ndihmën dhe mbështetjen e vazhdueshme të Forcave të Armatosura të Italisë për FA shqiptare në rrugën e tyre drejt integrimit të plotë në strukturat e NATO, si dhe bashkëpunimin e shkëlqyer që kemi pasur me Forcat e Armatosura italiane në Afganistan.
Më tej, dy bashkëbiseduesit kanë folur dhe diskutuar për situatën në rajonin tonë, marrëdhëniet dhe bashkëpunimin rajonal, sigurinë dhe stabilitetin, etj. Në këtë kontekst, ministri Imami ka theksuar se Shqipëria ka dhënë dhe do të vijojë të jap ndihmesën e saj për konsolidimin e shtetit të Kosovës dhe anëtarësimin e saj në institucionet dhe organizmat ndërkombëtare, si dhe mbështet marrëveshjen e fundit ndërmjet Republikës së Kosovës dhe Republikës së Serbisë.

Nga ana e tij, shefi i Shtabit të Mbrojtjes së Republikës së Italisë, admiral  Luigi Binelli Mantelli, falënderoi ministrin e Mbrojtjes Imami për pritjen që i rezervoi, si dhe vlerësoi arritjet e shënuara në rrugën e reformimit dhe modernizimit të FA Shqiptare. Admiral Mantelli ka nënvizuar bashkëpunimin në fushën e mbrojtjes ndërmjet dy vendeve tona, duke u ndalur sidomos në bashkëpunimin në operacionet e ISAF në Afganistan dhe në ato të Bashkimit Europian në të cilat kemi marrë pjesë. Admiral Luigi Binelli Mantelli ka nënvizuar veçanërisht kontributin e dhënë nga Delegacioni Italian i Ekspertëve, mision i cili për 16 vjet rresht ka shërbyer këtu në Shqipëri. Ky mision ka qenë shumë i rëndësishëm sepse jo vetëm i ka shërbyer forcimit dhe konsolidimit të FA shqiptare, por edhe forcimit të mëtejshëm të marrëdhënieve midis dy vendeve tona. Ai është shprehur gjithashtu se Italia dhe FA italiane do të vazhdojnë të mbështesin edhe në të ardhmen Shqipërinë dhe Forcat e saj të Armatosura në rrugën drejt integrimit të plotë në strukturat Euroatlantike.

Më herët, shefi i Shtabit të Mbrojtjes së Republikës së Italisë, admiral Luigi Binelli Mantelli, është pritur me Truproje Nderi nga shefi i Shtabit të Përgjithshëm i FA, gjeneralmajor Xhemal Gjunkshi. Pas takimit që zhvilluan dy ushtarakët më të lartë të dy vendeve tona, axhenda ka vijuar me takimin midis dy delegacioneve ushtarake të kryesuar përkatësisht nga shefi i Shtabit të Mbrojtjes së Republikës së Italisë, admiral Luigi Binelli Mantelli dhe nga shefi i Shtabit të Përgjithshëm i FA, gjeneralmajor Xhemal Gjunkshi. Me këtë rast, për delegacionin e lartë ushtarak italian nga drejtori i Drejtorisë së Planifikimit dhe Monitorimit të Mbrojtjes, kolonel Nazmi Cahani, u bë një prezantim i shkurtër për rrugën e transformimit dhe të modernizimit, anëtarësimit dhe integrimit të plotë në NATO të Forcave të Armatosura shqiptare.