Ministria e Mbrojtjes - Arkivi 2008-2013

Përfundon misioni i Delegacionit Italian të Ekspertëve (DIE) në vendin tonë

Ministri Imami: “Tashmë ne kemi një Shqipëri më stabile, shumë më të qëndrueshme dhe jemi të gjithë të lumtur për këtë. Ky është një kontribut i qytetarëve shqiptarë, është kontribut i të gjithë neve, padyshim edhe i miqve dhe bashkëpunëtorëve tanë, ku Italia ka një rol të veçantë. Vendi ynë tashmë është më i sigurt se asnjëherë, ai është anëtar i Aleancës më të madhe në botë, NATO”.

26 korrik 2013


Foto Galeri

b_230_153_16777215_00___images_galeria_2013_Korrik_26a_4.jpgNë rezidencën e ambasadorit të Italisë në Tiranë, u zhvillua sot ceremonia e përmbylljes së aktivitetit 16-vjeçar të Delegacionit Italian të Ekspertëve në Shqipëri (DIE). Në këtë ceremoni morën pjesë: ministri i Mbrojtjes, z. Arben Imami, shefi i Shtabit të Përgjithshëm i FA, gjeneralmajor Gjunkshi, zëvendësministrja e Mbrojtjes, znj Arta Musaraj, gjeneralë dhe ushtarakë të tjerë të lartë të Forcave të Armatosura, atashe ushtarakë të akredituar në vendin tonë, etj. Ndërsa nga pala italiane ishin të pranishëm: shefi i Shtabit të Përgjithshëm i Mbrojtjes italiane, admiral Luigi Binelli Mantelli, ambasadori i Italisë në Shqipëri, Massimo Gaiani, efektivë të Delegacioni Italianë të Ekspertëve në Tiranë, etj.

Ceremoninë e hapi ambasadori i Republikës së Italisë në Shqipëri, Massimo Gaiani, ndërsa më pas ka përshëndetur shefi i Shtabit të Përgjithshëm i Mbrojtjes italiane, admiral Luigi Binelli Mantelli. Admiral Mantelli vlerësoi me nota shumë pozitive marrëdhëniet midis dy vendeve dhe ushtrive tona, lidhjet me traditat dhe historinë, duke veçuar sidomos figurën e heroit tonë kombëtar, Gjergj Kastrioti Skënderbeu, poetin dhe shkrimtarin Jeronim De Rada, etj. Admiral Mantelli është ndalur sidomos në rolin dhe kontributin e vyer që ka dhënë në këto 16 vjet DIE në Shqipëri, për punën dhe kontributin e drejtuesve dhe efektivave të saj, për bashkëpunimin e frytshëm të tyre me drejtuesit dhe ushtarakët e FA shqiptare, duke theksuar në fund se: “me kënaqësi mund të themi se tashmë ky mision u përmbush me sukses të plotë”.

Duke marrë fjalën në ceremoninë e përfundimit të misionit të DIE në Shqipëri, ministri i Mbrojtjes Imami u shpreh se: “jemi në një moment ceremonial të rëndësishëm, mbyllim një fazë të bashkëpunimit midis Forcave të Armatosura të Shqipërisë dhe Forcave të Armatosura të Italisë”. Me këtë rast, z. Imami ka falënderuar DIE që për gati 16 vjet ka ushtruar veprimtarinë e saj këtu në Shqipëri dhe ka qenë një bashkudhëtare në rrugën tonë drejt anëtarësimit në NATO dhe në integrimin e plotë të Forcave tona të Armatosura në këtë Aleancë. Ai ka falënderuar gjithashtu drejtuesit e këtij misioni ndër vite dhe veçanërisht komandant Pellegrinin, i cili kryeson aktualisht këtë delegacion.

Duke u ndalur në momentin e përfundimit të këtij misioni, ministri Imami u shpreh: “Tashmë ne kemi një Shqipëri më stabile, shumë më të qëndrueshme dhe jemi të gjithë të lumtur për këtë. Ky është një kontribut i qytetarëve shqiptarë, është kontribut i të gjithë neve, padyshim edhe i miqve dhe bashkëpunëtorëve tanë, ku Italia ka një rol të veçantë. Vendi ynë tashmë është me i sigurt se asnjëherë, ai është anëtar i Aleancës më të madhe në botë, NATO”. Më tej, ministri Imami ka nënvizuar ndihmën dhe kontributin e dhënë ndër vite nga misioni i DIE, që nga ato më të domosdoshmet dhe urgjentet dhe deri tek ndihma më të profilizuara dhe të shtrira në të gjitha fushat e mbrojtjes. “Edhe në të ardhmen do të vijojë një bashkëpunim akoma më i thellë, më i rëndësishëm dhe më strategjik midis dy ushtrive tona, si dy ushtri që qëndrojnë në barazi dhe dinjitet të plotë në NATO”, - ka shprehur bindjen e tij, ministri i Mbrojtjes, z. Arben Imami.

Në fund të ceremonisë, ministri i Mbrojtjes Imami u dorëzoi medalje “Për Shërbime të Shquara” personelit të DIE për kontributin e çmuar të dhënë në mbështetjen teknike, stërvitore dhe organizative të planeve të zhvillimit të FA shqiptare dhe përshtatjen e tyre me standardet e NATO. Ndërsa komandanti i DIE, kapiten i rangut të parë, Massimo Pellegrini i dorëzoi ministrit Imami një dhuratë në formë pllakate në kujtim të misionit prej 16 vjetësh bashkëpunimi dhe mbështetjeje nga mbrojtja italiane nëpërmjet DIE në Shqipëri.

Delegacioni Italian i Ekspertëve u krijua më 28 gusht të vitit 1997, pas firmosjes së një protokolli të posaçëm ministerial dypalësh, si shprehje dhe përgjigje e qeverisë italiane ndaj nevojave për mbështetje të Shqipërisë dhe në veçanti të Forcave të saj të Armatosura, të cilat në atë kohë kalonin një gjendje të vështirë shkaktuar nga rënia e regjimit komunist në vitin 1991. Delegacioni në organikën e tij ushtarake gjitharmëshe, mori detyrën për të mbështetur FA shqiptare në procesin e përshtatjes të strukturave të saj me standardet perëndimore dhe me modelin e NATO.

DIE si element koordinues i mbrojtjes italiane në Shqipëri ka qenë një model konkret dhe efikas bashkëpunimi midis FA të dy vendeve, duke i dhënë jetë një forme bashkëpunimi direkte e cila nga asistencë e mirëfilltë, u transformua gjatë viteve në një organizëm bashkëpunimi që përfshiu të gjithë personelin e FA shqiptare, në sektorë dhe shërbime të ndryshme si ai i shëndetësisë ushtarake, i shërbimit meteorologjik, kërkim-shpëtimin, xhenios, për Forcat Detare, Forcat Ajrore, mbrojtjen civile, etj. Ky bashkëpunim ka mundësuar deri edhe në pjesëmarrjen e ushtarakëve shqiptarë në misione të shumta të tipit Peace Support Operations (PSO), të cilat janë kurorëzuar në janar 2008, me inkuadrimin e një kompanie të FA shqiptare në Afganistan dhe me hyrjen e Shqipërisë në NATO në vitin 2009. Përfundimi i misionit të DIE në Shqipëri përbën një moment domethënës të progresit, të zhvillimit të mbrojtjes shqiptare në NATO dhe gjithashtu të një evoluimi pozitiv të marrëdhënieve dypalëshe italo-shqiptare.