Ministria e Mbrojtjes - Arkivi 2008-2013

Ministri i Mbrojtjes Arben Imami mori pjesë në stërvitjen “Albanian Lion 2013”

02 shtator 2013

Foto Galeri

b_210_140_16777215_00___images_galeria_2013_Shtator_02_06.jpgNë Bazën Detare të Pashalimanit u zhvillua dje “Dita e Vizitorëve të Shquar” të stërvitjes së koduar “Albanian Lion 2013”. Kjo stërvitje zhvillohet në kuadër të bashkëpunimit midis FA të Shqipërisë dhe FA të Mbretërisë së Bashkuar. Të pranishëm në këtë aktivitet ishin: presidenti i Republikës së Shqipërisë, z. Bujar Nishani, ministri i Mbrojtjes, z. Arben Imami, ministri i Forcës së Sigurisë së Kosovës, z. Agim Çeku, shefi i Shtabit të Përgjithshëm i FA, gjeneralmajor Xhemal Gjunkshi, Komandanti i FSK, gjenerallejtënant Kadri Kastrati, ambasadori i Mbretërisë së Bashkuar në vendin tonë, z. Nicholas Cannon, si dhe personalitete të tjera politike dhe ushtarake.

Ceremonia u zhvillua në bordin e aeroplanmbajtëses “HMS Illustrious”, e cila ishte vendosur në hapësirën detare të gjirit të Vlorës. Pas mbërritjes së personaliteteve në bordin e “HMS Illustrious“, u zhvilluan disa demonstrime detare dhe ajrore të flotës britanike me pjesëmarrjen edhe të flotës shqiptare. Gjatë vizitës në bordin e aeroplanmbajtëses, presidenti Nishani takoi drejtues të trupave ushtarake britanike që po zhvillojnë stërvitjen e përbashkët “Albanian Lion 2013”.

Gjatë fjalës që mbajti me këtë rast, presidenti i Republikës, z. Bujar Nishani e cilësoi këtë stërvitje si stërvitjen më të madhe që forcat britanike kanë zhvilluar gjatë viteve të fundit në rajonin e Mesdheut. Kjo stërvitje, ka vijuar më tej presidenti Nishani, është një tregues i drejtpërdrejtë i solidaritetit që ekziston mes dy vendeve tona dhe forcave ushtarake respektive. "Mes Shqipërisë dhe Britanisë ka një histori të gjatë bashkëpunimi që spikat me Luftën e Dytë Botërore dhe vijon ende në kuadrin e NATO dhe ne ndajmë vlera të përbashkëta”, ka nënvizuar, ndër të tjera, presidenti Nishani.

Ndërsa ministri i Mbrojtjes, z. Arben Imami, në fjalën e tij u shpreh: “Jam i nderuar që marr pjesë në një ngjarje mjaft të rëndësishme për FA Shqiptare dhe FA Britanike. Si ministër i Mbrojtjes jam shumë i lumtur që shoh një nga stërvitjet më të mëdha ushtarake të Forcave të Armatosura Britanike që zhvillohet jashtë territorit të saj dhe që realizohet në bashkëpunim me FA Shqiptare”. Në vijim të fjalës së tij, ministri Imami u shpreh se, ky është viti i tretë që kjo stërvitje zhvillohet në vendin tonë dhe është me përfitim për të dyja vendet që të vazhdojë të zhvillohet edhe në vitet e ardhshme, duke u kthyer në një traditë frymëzuese për Forcat tona të Armatosura. Duke u ndalur tek rëndësia e kësaj stërvitjeje Imami ka theksuar se duke marrë përvojën nga një prej ushtrive më të lavdishme të botës, siç janë FA të Madhërisë së Saj dhe veçanërisht prej Marinës, është një privilegj dhe një moment i madh për të fituar sa më shumë të jetë e mundur. “Kjo është një mundësi për të rritur kapacitetin e Forcave tona të Armatosura, në mënyrë që të bëhemi më të ndërveprueshëm me forcat e aleatëve tanë të mëdhenj të NATO. Për ne kjo stërvitje ushtarake ka qenë një prej përparësive më të mëdha gjatë këtyre viteve dhe kjo nuk ishte thjesht vetëm një nevojë, por ishte rëndësi jetësore për zhvillimin e një force të armatosur të vogël, të lëvizshme dhe të ndërveprueshme. Ne kemi shpenzuar më shumë burime, energji dhe kohë për stërvitjet ushtarake dhe për herë të parë pas viteve ‘90, ne mundëm të zhvillonim vitin e kaluar një stërvitje që përfshinte shumë njësi të Forcave tona të Armatosura”, theksoi Imami. Disa vite më parë, ka vijuar më tej ministri Imami, bashkëpunimi midis FA Shqiptare dhe FA Britanike ishte shumë i ulët, për të mos thënë inekzistent, ndërsa tani kemi një pamje tjetër të këtyre marrëdhënieve. “Ne e kemi shndërruar bashkëpunimin politiko-ushtarak me vendet aleate si Britania, Franca, Italia, Austria, Turqia etj., nga fjalë në vepra konkrete. Tani ne kemi një hartë të qartë dhe plane konkrete bashkëpunimi me aleatët tanë strategjikë, i cili është një përfitim i madh për ne dhe që do të zhvillohet më tej në të ardhmen”, është shprehur z. Imami. Në fund të fjalës së tij, ai falënderoi qeverinë e Mbretërisë së Bashkuar për të gjithë ndihmën që ka dhënë për Shqipërinë dhe Forcat e Armatosura, në veçanti për qëndrimin politik konstant ndaj Shqipërisë dhe popullit shqiptar, i cili u finalizua me çlirimin dhe pavarësinë e Kosovës.

Në stërvitjen “Albanian Lion 2013” marrin pjesë 3000 trupa britanike, komando dhe forca detare, si edhe një efektiv prej 35 vetash nga Forcat e Armatosura Holandeze, të cilat operojnë në këtë stërvitje së bashku me trupat britanike. Stërvitja “Albanian Lion 2013” shtrihet në një territor të gjerë, nga rajoni i Bizës, në Pashaliman, Kuçovë, Karaburun dhe Sazan. Në këtë stërvitje, Forcat e Armatosura Shqiptare janë angazhuar me trupa dhe mjete të Forcës Detare dhe me efektivë të Forcës Tokësore.