Ministria e Mbrojtjes - Arkivi 2008-2013

Ministrja e Mbrojtjes Kodheli merr pjesë në Ministerialin Gjithëpërfshirës të Rajonit

02 tetor 2013

Foto Galeri

b_160_230_16777215_00___images_galeria_2013_Tetor_02_02.jpgMinistrja e Mbrojtjes, znj. Mimi Kodheli, prej datës 01 tetor 2013, ndodhet në Brdo, Kranj, të Sllovenisë, për të marrë pjesë në Ministerialin Gjithëpërfshirës të Rajonit 2013 (Comprehensive Regional Ministerial), i cili konsiston në dy takime: Ministeriali i Kartës së Adriatikut-SHBA (A-5), si dhe Ministeriali i Mbrojtjes së vendeve të Europës Juglindore (SEDM).
Në ditën e parë, ministrja e Mbrojtjes, znj. Mimi Kodheli, zhvilloi një takim dypalësh me ndihmësasistenten e sekretarit të Mbrojtjes të SHBA, znj. Evelyn Farkas.

Ndihmësasistentja e sekretarit të Mbrojtjes të SHBA, znj. Farkas ka uruar znj. Kodheli për detyrën e re si ministre e Mbrojtjes, ndërsa ministrja Kodheli vlerësoi marrëdhëniet e shkëlqyera midis Republikës së Shqipërisë dhe Shteteve të Bashkuara të Amerikës, duke theksuar se Ministria e Mbrojtjes dhe qeveria shqiptare e konsideron SHBA si partnerin kryesor strategjik si në politikën e jashtme ashtu dhe në  bashkëpunimin në fushën e Mbrojtjes. Ministrja Kodheli ka cilësuar mbështetjen e vazhdueshme që SHBA ka dhënë në procesin e reformimit dhe transformimit të Forcave të Armatosura shqiptare duke i ndihmuar këto të fundit të arrijnë standardet e NATO në kapacitetet e mbrojtjes dhe modernizimin ushtarak.

Nga ana saj, znj. Farkas u ndal veçanërisht në disa çështje që kërkojnë rritjen e nivelit të bashkëpunimit në të ardhmen, duke përmendur këtu bashkëpunimin në fushën e inteligjencës, trajnimit dhe kualifikimit të personelit të Forcave të Armatosura me synim rritjen e standardit profesional të ushtarakëve. Gjithashtu ajo theksoi se fenomeni i korrupsionit dhe lufta ndaj tij mbetet një nga fushat që kërkon prioritet dhe për Ministrinë e Mbrojtjes.

Ministrja Kodheli garantoi përfaqësuesen e lartë të Departamentit Amerikan të Mbrojtjes, për vendosmërinë e saj si ministre e Mbrojtjes dhe të qeverisë shqiptare për angazhimin ndaj fenomeneve negative, duke vënë fokusin kryesor në luftën ndaj korrupsionit, rritjen e profesionalizimit dhe depolitizimin në institucionin e Ministrisë së Mbrojtjes. Gjithashtu ministrja Kodheli renditi prioritet e Ministrisë së Mbrojtjes duke përmendur këtu zbatimin e konstatimeve dhe rekomandimeve të Rishikimit Strategjik të Mbrojtjes, dokument i hartuar me ndihmën e Departamentit Amerikan të Mbrojtjes, vazhdimin e reformimit të Forcave të Armatosura shqiptare, plotësimin e të gjithë detyrimeve si vend anëtar i NATO. Ministrja Kodheli siguroi ndihmësasistenten e Sekretarit të Mbrojtjes të SHBA se Shqipëria do të vazhdojë të qëndrojë në Afganistan për sa kohë NATO dhe SHBA do të jenë atje, duke koordinuar çdo veprim në të ardhmen me SHBA. Shqipëria do të luajë rolin e saj brenda Iniciativës së Kartës së Adriatikut, si dhe iniciativave të tjera duke promovuar vlerat dhe standardet e kërkuara nga shtetet e tjera drejt procesit të anëtarësimit në NATO, - theksoi ministrja e Mbrojtjes Kodheli.

Gjithashtu, ministrja e Mbrojtjes Kodheli zhvilloi një takim edhe me ministrin e Mbrojtjes të Sllovenisë, z. Roman Jakič. Në këtë takim, z. Jakič e ka uruar znj. Kodheli për detyrën e re si ministre e Mbrojtjes, ndërsa ministrja Kodheli e përgëzoi pikë së pari për iniciativën e ndërmarrë nga Ministria e Mbrojtjes së Sllovenisë për të organizuar për herë të parë një Ministerial Gjithëpërfshirës të Rajonit, duke mbledhur të gjithë ministrat e Mbrojtjes së Europës Juglindore dhe më tej në dy ministeriale me tematika të ndryshme në të njëjtin kohë dhe vend, duke theksuar më tej se edhe vendet e tjera të vazhdojnë këtë nismë të Sllovenisë. Ministrja Kodheli vlerësoi marrëdhëniet shumë të mira midis Republikës së Shqipërisë dhe Sllovenisë.

Të dy ministrat e Mbrojtjes ranë dakord për rritjen e bashkëpunimit në fushën e Mbrojtjes, më konkretisht, bashkëpunimin në përballimin e emergjencave civile, duke marrë pjesë në organizimin e stërvitjeve të përbashkëta, trajnime dhe shkëmbim eksperience në kuadër të stërvitjeve malore. Gjatë takimit nga ana e dy ministrave u vlerësua gjithashtu bashkëpunimi ndërmjet dy vendeve tona në kuadër të iniciativave rajonale ku Shqipëria dhe Sllovenia bëjnë pjesë, siç janë SEDM dhe A-5.