Ministria e Mbrojtjes - Arkivi 2008-2013

Ministrja e Mbrojtjes Kodheli merr pjesë në Ministerialin e Mbrojtjes të Evropës Juglindore (SEDM)

Ministrja e Mbrojtjes Mimi Kodheli: Politika e dyerve të hapura, që aq shumë promovojmë, humbet kuptimin e saj, nëse nuk bazohet në parimin gjithëpërfshirës.

03 tetor 2013

b_210_140_16777215_00___images_galeria_2013_Tetor_03a_00.jpgNë ditën e dytë të Ministerialit Gjithëpërfshirës të Rajonit 2013 (Comprehensive Regional Ministerial), që po mbahet në Brdo, Slloveni, ministrja e Mbrojtjes, znj. Mimi Kodheli mori pjesë në takimin e ministrave të Mbrojtjes të vendeve të Europës Juglindore (SEDM).
I iniciuar në vitin 1996 në Tiranë, SEDM vazhdon të promovojë bashkëpunimin politiko–ushtarak, marrëdhëniet e fqinjësisë së mirë, si dhe forcimin e kapaciteteve  të mbrojtjes, jo vetëm në rajon, por dhe më gjerë. Ajo që zë një vend kryesor në këtë iniciativë është Forca Shumëkombëshe e Paqes e Europës Juglindore (SEEBRIG).

Ministrja Mbrojtjes, znj. Mimi Kodheli në fjalën që mbajti në këtë ministerial theksoi se, procesi 17 vjeçar i SEDM ka qenë shumë i suksesshëm dhe ka ndikuar në dobi të paqes, stabilitetit, sigurisë dhe demokracisë në rajon. Sot pas shumë vitesh që nga krijimi, ka theksuar ndër të tjera znj. Kodheli, vihet re një diversitet anëtarësimi në këtë iniciativë, shumë vende janë anëtare të Bashkimit Europian dhe NATO, shumë vende të tjera po ndërmarrin hapa të shpejtë për t’u bërë pjesë e këtyre organizatave duke marrë si shembull eksperiencën e vendeve tashmë të integruara.

Në vijim të fjalës së saj, ministrja Kodheli nënvizoi se, që nga krijimi i SEDM dhe SEEBRIG, shumë gjëra kanë ndryshuar, ambienti i sigurisë dhe mbrojtjes ndryshon në mënyrë konstante dhe për pasojë lind nevoja të përballemi me sfida të reja. Organizata jonë, shtoi ajo, duhet të ripërcaktojë prioritetet strategjike për të përballur dhe menaxhuar situatat që realiteti i ri na ofron. Duke marrë shkas nga sa më sipër, ministrja e Mbrojtjes Kodheli vlerësoi edhe punën që po bëhet për hartimin e dokumentit të Rishikimit Strategjik të SEDM dhe nënvizoi se, roli i SEDM mund të rritet, duke krijuar më shumë hapësirë për dialog politik për sigurinë dhe problemet që lidhen me rajonin tonë. Përballë sfidave që po përballet rajoni dhe partnerët tanë, koncepti i ri “Smart Defense” paraqet një axhendë të ngjeshur për të gjithë ne. Shqipëria ka mbështetur dhe do të vazhdojë te mbështesë çdo projektet të SEDM duke përfshirë dhe projektet e reja, të cilat i shërbejnë stabilitetit në rajon e më gjerë, ka theksuar znj. Kodheli. Në këtë kuadër znj. Kodheli shprehu mbështetjen e Shqipërisë për zhvillimin e “interoperability and deployability” të SEEBRIG në mënyrë që të rrisë aftësinë e tij në dobi të paqes dhe sigurisë rajonale, por edhe në dobi të misioneve ushtarake ndërkombëtarë të NATO.

Gjatë fjalës së saj, ministrja e Mbrojtjes Kodheli e vuri theksin edhe në një nga çështjet kryesore të SEDM, siç është zgjerimi i kësaj iniciative me anëtarë të rinj. Më konkretisht, znj. Kodheli deklaroi se, politika e dyerve të hapura është konsideruar si një nga parimet madhore të zhvillimit të rajonit dhe për këtë arsye, Shqipëria qëndron thellësisht e angazhuar në mbështetjen e kësaj politike për çdo vend që pranon parimet dhe kërkon të kontribuojë në kuadër të kësaj iniciative. Në këtë kontekst, theksoi ministrja Kodheli, bashkëpunimi rajonal nuk do të jetë i plotë pa pjesëmarrjen e të gjithë vendeve të rajonit, përndryshe politika e dyerve të hapura, që ne promovojmë aq shumë, do të humbte kontekstin e saj.

Znj. Kodheli nënvizoi, se duke marrë në konsideratë marrëveshjen e arritur midis Kosovës dhe Serbisë, në muajin prill, ku të dyja palët kanë dhënë angazhimin për të punuar së bashku drejt një të ardhme më të mirë drejt Bashkimit Evropian, ftoj të gjithë vendet anëtare të kësaj iniciative të orientohen drejt të ardhmes për sa i takon implementimit të politikës së dyerve të hapura.  

Në fund të fjalës së saj, ministrja Kodheli, në emër të qeverisë shqiptare dhe të institucionit që ajo drejton, garantoi këtë forum se, Shqipëria do të jetë e angazhuar për të mbrojtur sigurinë e Evropës Juglindore dhe të ardhmen e saj.