Ministria e Mbrojtjes - Arkivi 2008-2013

Ministrja Kodheli zhvillon takime me ministren Plotësuese të Mbrojtjes të Greqisë dhe ministrin e Mbrojtjes të Kroacisë

03 tetor 2013

b_170_212_16777215_00___images_homepage_logo_mm.pngMinistrja e Mbrojtjes e Shqipërisë, znj. Mimi Kodheli, e cila po merr pjesë në Ministerialin Gjithëpërfshirës të Rajonit 2013 (Comprehensive Regional Ministerial), në Brdo, Slloveni, ka zhvilluar sot një takim dypalësh me ministren Plotësuese të Mbrojtjes Kombëtare të Greqisë, znj. Fofi Gennimata, me kërkesën e kësaj të fundit. Pasi e uroi për detyrën, duke shtuar domethënien që mbart emërimi i zonjës Kodheli në ketë post, znj. Gennimata shtroi si çështje domosdoshmërinë e forcimit të bashkëpunimit midis dy vendeve tona, veçanërisht në fushën e mbrojtjes.

Vizita e pritshme e ministrit të Jashtëm të Greqisë, Venizellos në Tiranë, u theksua në këtë takim, dëshmon dimensionin e ri të marrëdhënieve midis dy vendeve tona.  Znj. Gennimata, në mënyre të veçantë u ndal në nevojën për realizimin e më shumë aktiviteteve në kuadër të Planit të Bashkëpunimit Dypalësh. Edhe pse në kushtet e vështirësive financiare, ka theksuar ajo, forcimi i bashkëpunimit në fushën e mbrojtjes do të bëjë të mundur menaxhimin më të mirë të burimeve financiare.

Nga ana e saj, ministrja Kodheli, duke e falënderuar për takimin dhe mbështetjen e znj. Gennimata, theksoi domosdoshmërinë e forcimit të marrëdhënieve, si dy vende fqinjë me një histori të lashtë dhe interesa të përbashkëta. Ajo ndau të njëjtin mendim se, situata financiare nuk duhet të na pengojë për vazhdimin e bashkëpunimit në fushën e mbrojtjes.

Të dy ministrat gjithashtu theksuan nevojën e gjetjeve të fushave të reja dhe me interes të përbashkët bashkëpunimi siç janë: shkëmbimi i eksperiencave në fushën e teknologjisë dhe atë të kibernetikës.   

***

Po sot, ministria e Mbrojtjes, znj. Mimi Kodheli është takuar edhe me  ministrin e Mbrojtjes të Kroacisë, z. Ante Kotromanović. Në këtë takim, të dy ministrat e Mbrojtjes ndanë mendimin se marrëdhëniet e deritanishme mes dy vendeve tona nuk kanë qenë në nivelin e dëshiruar. Për këtë arsye, ridimensionimi i tyre është i domosdoshëm. Duke u përqendruar në rëndësinë që merr Iniciativa A-5 për vendet pjesëmarrëse, ministri kroat i Mbrojtjes, z. Kotromanović vuri theksin në rritjen e bashkëpunimit në kuadër të kësaj iniciative. Me tej, ai theksoi gatishmërinë e vendit të tij për të mbështetur integrimin e Kosovës në iniciativat rajonale. Bashkëpunimi nëpërmjet projekteve të përbashkëta dhe më konkretisht rreth sigurisë detare, rritja e bashkëpunimit ndërmjet Forcave Detare të dy vendeve për mbrojtjen nga ndotja të detit Adriatik, ishin gjithashtu në fokus të bisedimeve, sipas propozimit të paraqitur nga ministrja Kodheli.

Gjithashtu, ministrja Kodheli kërkoi që bashkërisht të gjenden rrugë të reja bashkëpunimi, të cilat të mund të përfshijnë edhe Kosovën. Po ashtu, pala kroate ofroi mundësinë e trajnimit të personelit ushtarak në fusha për të cilat Forcat e Armatosura të Republikës së Shqipërisë kanë nevojë.
Ministrja Kodheli, duke vënë theksin në vlerat e përbashkëta të të dy vendeve, konfirmoi gatishmërinë e saj dhe të Ministrisë së Mbrojtjes për ridimensionin e marrëdhënieve dypalëshe, duke filluar pa humbur kohë implementimin e projekteve të përbashkëta.

Në fund të takimit, ministri kroat i Mbrojtjes Kotromanović ftoi ministren e Mbrojtjes së Shqipërisë, znj. Kodheli për një vizitë zyrtare në Kroaci.