Ministria e Mbrojtjes - Arkivi 2008-2013

Ministrja Kodheli në Ministerialin Gjithëpërfshirës të Rajonit zhvilluar në Slloveni

 
Ministrja e Mbrojtjes, znj. Mimi Kodheli, prej datës 01 tetor 2013, ndodhet në Brdo, Kranj, të Sllovenisë, për të marrë pjesë në Ministerialin Gjithëpërfshirës të Rajonit 2013 (Comprehensive Regional Ministerial), i cili konsiston në dy takime: Ministeriali Karta e Adriatikut-SHBA (A-5), si dhe Ministeriali i Mbrojtjes i vendeve të Europës Juglindore (SEDM).
 
Në ditën e parë, ministrja e Mbrojtjes, znj. Mimi Kodheli, zhvilloi një takim dypalësh me ndihmësasistenten e sekretarit të Mbrojtjes të SHBA, znj. Evelyn Farkas.
 
Ndihmësasistentja e sekretarit të Mbrojtjes të SHBA, znj. Farkas ka uruar znj. Kodheli për detyrën e re si ministre e Mbrojtjes, ndërsa ministrja Kodheli vlerësoi marrëdhëniet e shkëlqyera midis Republikës së Shqipërisë dhe Shteteve të Bashkuara të Amerikës, duke theksuar se Ministria e Mbrojtjes dhe qeveria shqiptare e konsideron SHBA si partnerin kryesor strategjik si në politikën e jashtme ashtu dhe në bashkëpunimin në fushën e Mbrojtjes. Ministrja Kodheli ka cilësuar mbështetjen e vazhdueshme që SHBA ka dhënë në procesin e reformimit dhe transformimit të Forcave të Armatosura shqiptare duke i ndihmuar këto të fundit të arrijnë standardet e NATO në kapacitetet e mbrojtjes dhe modernizimin ushtarak.
 
 
Gjithashtu, ministrja e Mbrojtjes Kodheli zhvilloi një takim edhe me ministrin e Mbrojtjes të Sllovenisë, z. Roman Jakič. Në këtë takim, z. Jakič e ka uruar znj. Kodheli për detyrën e re si ministre e Mbrojtjes, ndërsa ministrja Kodheli e përgëzoi pikë së pari për iniciativën e ndërmarrë nga Ministria e Mbrojtjes së Sllovenisë për të organizuar për herë të parë një Ministerial Gjithëpërfshirës të Rajonit, duke mbledhur të gjithë ministrat e Mbrojtjes së Europës Juglindore dhe më tej në dy ministeriale me tematika të ndryshme në të njëjtin kohë dhe vend, duke theksuar më tej se edhe vendet e tjera të vazhdojnë këtë nismë të Sllovenisë. Ministrja Kodheli vlerësoi marrëdhëniet shumë të mira midis Republikës së Shqipërisë dhe Sllovenisë.
 
 
 

Ministeriali i Mbrojtjes SHBA-Karta e Adriatikut

Ministeriali i Mbrojtjes SHBA-Karta e Adriatikut (A-5) u hap nga ministri i Mbrojtjes malazez, z. Milica Pejanovič Đurišič, kryetari i mbledhjes së kësaj iniciative. Fillimisht, pjesëmarrësit u përshëndeten nga ministri i Mbrojtjes slloven z. Roman Jakič, i cili shprehu kënaqësinë e tij për pjesëmarrjen e të gjithë ministrave të vendeve anëtare të Kartës së Adriatikut.
 
Ministrat e Mbrojtjes konfirmuan dhe njëherë rëndësinë e procesit të Integrimit Euro-Atlantik për forcimin e stabilitetit dhe sigurisë në vendet e Europës Juglindore. Duke marrë në konsideratë rëndësinë e bashkëpunimit ndërmjet vendeve anëtare të kësaj iniciative në fushën e sigurisë dhe mbrojtjes, ky takim ishte një rast i mirë për të diskutuar rreth sfidave globale të sigurisë me të cilën vendet tona po përballen.
 
Në këtë takim një rëndësie të veçantë iu kushtua rolit të Shqipërisë, Kroacisë dhe SHBA, si vende anëtare të NATO, në mbështetjen që po i japin vendeve të tjera pjesëmarrëse në këtë iniciativë në procesin e integrimit në NATO apo struktura të tjera rajonale.
 
Ministrja e Mbrojtjes e Shqipërisë, znj. Mimi Kodheli gjatë fjalës së saj u shpreh se, Shqipëria prej një kohe të gjatë është e angazhuar në Afganistan dhe do të vazhdojë të kontribuojë duke bashkëpunuar ngushtë me vendet e tjera, për të mbështetur akoma më shumë qeverinë afgane në forcimin e sigurisë dhe rimëkëmbjen e institucioneve. Znj. Kodheli garantoi se Shqipëria do të jetë pjesë e nismave të ndërmarra nga A-5 për të ndihmuar Afganistanin në fushat e këshillimit ushtarak, policisë ushtarake, si dhe trajtimin mjekësor. Gjithashtu, ministrja Kodheli diskutoi në lidhje me projektet e ndërmarra në kuadër të kësaj iniciative si mekanizim praktik i bashkëpunimit rajonal.
 
Për më tepër ndiqni linkun: SHBA-Karta e Adriatikut
 
 

Ministeriali i Mbrojtjes i Evropës Juglindore (SEDM)

Në ditën e dytë të Ministerialit Gjithëpërfshirës të Rajonit 2013, ministrja e Mbrojtjes, znj. Mimi Kodheli mori pjesë në takimin e ministrave të Mbrojtjes të vendeve të Europës Juglindore (SEDM).
 
Ministrja Mbrojtjes, znj. Mimi Kodheli në fjalën që mbajti në këtë ministerial theksoi se, procesi 17 vjeçar i SEDM ka qenë shumë i suksesshëm dhe ka ndikuar në dobi të paqes, stabilitetit, sigurisë dhe demokracisë në rajon. Sot pas shumë vitesh që nga krijimi, ka theksuar ndër të tjera znj. Kodheli, vihet re një diversitet anëtarësimi në këtë iniciativë, shumë vende janë anëtare të Bashkimit Europian dhe NATO, shumë vende të tjera po ndërmarrin hapa të shpejtë për t’u bërë pjesë e këtyre organizatave duke marrë si shembull eksperiencën e vendeve tashmë të integruara.
 
Për më tepër ndiqni linkun: SEDM
 
Ministrja Kodheli, ka zhvilluar një takim dypalësh me ministren Plotësuese të Mbrojtjes Kombëtare të Greqisë, znj. Fofi Gennimata, me kërkesën e kësaj të fundit.
 
 
Ministria e Mbrojtjes, znj. Mimi Kodheli është takuar edhe me ministrin e Mbrojtjes të Kroacisë, z. Ante Kotromanović.
 
Për më tepër ndiqni linkun: Takim me ministrin e Mbrojtjes të Kroacisë