Ministria e Mbrojtjes - Arkivi 2008-2013

Ministrja e Mbrojtjes Kodheli dekoron atasheun ushtarak të Mbretërisë së Bashkuar, nënkolonel Philip Osment

07 tetor 2013

Foto Galeri

b_210_140_16777215_00___images_galeria_2013_Tetor_07_3.jpgSot paradite, në ambjentet e Ministrisë së Mbrojtjes u  zhvillua ceremonia e dekorimit të atasheut ushtarak të Mbretërisë së Bashkuar, nënkolonel Philip Osment, i cili përfundoi misionin e tij në vendin tonë. Në këtë ceremoni ishin të pranishëm: ministrja e Mbrojtjes, znj. Mimi Kodheli, shefi i Shtabit të Përgjithshëm i Forcave të Armatosura, gjeneralmajor Xhemal Gjunkshi, ambasadori i Mbretërisë së Bashkuar në Tiranë, z. Nicholas Cannon, përfaqësues nga ambasada e Mbretërisë së Bashkuar në Tiranë, drejtues dhe ushtarakë të lartë në Ministrinë e Mbrojtjes dhe Shtabin e Përgjithshëm.

Ministrja e Mbrojtjes, znj. Mimi Kodheli, duke marrë fjalën në këtë ceremoni, u shpreh: “Një muaj pas emërimit si ministër i Mbrojtjes, pata mundësinë të vizitoj anijen britanike “Illustrious”, në Pashaliman. Kjo ishte një mundësi për të parë nga afër performancën e Marinës Mbretërore, dhe mund të them se më la shumë përshtypje”.
“Sot jemi mbledhur në këtë ceremoni, për të vlerësuar punën dhe kontributin e shkëlqyer të nënkolonel Philip Osment, për forcimin e bashkëpunimit mes dy Forcave tona të Armatosura, në veçanti nëpërmjet stërvitjeve të përbashkëta, të cilat mendoj se janë të një rëndësie themelore për përmirësimin e ndërveprueshmërisë si aleatë të NATO”. Duke u ndalur tek kontributi i nënkolonel Osment, ministrja Kodheli theksoi se ai ka qenë pjesë e një ekipi, i cili i kthen prioritetet politike në veprime konkrete dhe kjo është saktësisht ajo që ai ka bërë me dashuri dhe pasion, në bashkëpunim të ngushtë me Ministrinë e Mbrojtjes dhe Shtabin e Përgjithshëm”.

Në vijim të fjalës së saj, ministrja Kodheli u theksoi se medalja “Për Shërbime të Shquara”, i akordohet, nënkolonel Philip Osment për kontributin e tij në forcimin e marrëdhënieve dypalëshe të Mbrojtjes.
Gjithashtu, ministrja e Mbrojtjes, znj. Mimi Kodheli, pasi i ka uruar suksese nënkolonel Philip Osment në detyrën e tij të re, i uroi mirëseardhjen edhe atasheut të ri ushtarak të Mbretërisë së Bashkuar, nënkolonel Richard Perry.

Më tej, ministrja Kodheli ka shprehur besimin, se nëpërmjet punës së ngushtë mes dy palëve do të mundësohet forcimi dhe zgjerimi i mëtejshëm i marrëdhënieve në fushën e Mbrojtjes mes dy vendeve. Një falënderim të veçantë, ministrja e Mbrojtjes Kodheli i shprehu ambasadorit të Mbretërisë së Bashkuar në Tiranë, z. Nicholas Cannon, për angazhimin, përkushtimin dhe interesin e përhershëm në mbështetje të bashkëpunimit ushtarak mes Mbretërisë së Bashkuar dhe Shqipërisë.
Në përfundim të fjalës së saj, ministrja e Mbrojtjes falënderoi personelin e Ministrisë së Mbrojtjes dhe Shtabit të Përgjithshëm për bashkëpunimin e frytshëm që kanë me palën britanike për të garantuar aktivitete të suksesshme dypalëshe.

Më pas ministrja e Mbrojtjes, znj. Mimi Kodheli i ka dorëzuar atasheut ushtarak të Mbretërisë së Bashkuar, nënkolonel Philip Osment medaljen, “Për Shërbime të Shquara”, me motivacionin: “Për kontributin e dhënë nëpërmjet punës së tij si atashe ushtarak në drejtim të forcimit të marrëdhënieve dhe bashkëpunimit dypalësh në fushën e mbrojtjes midis Mbretërisë së Bashkuar dhe Republikës së Shqipërisë”.

Nga ana e tij, nënkolonel Philip Osment u shpreh: “Nuk gjej fjalë për t’ju falënderuar për vlerësimin e lartë që i bëtë punës time. Stafi i Ministrisë së Mbrojtjes, Shtabit të Përgjithshëm dhe të gjithë ata me të cilët pata fatin të bashkëpunoj do të mbeten gjithmonë në zemrën time”, - përfundoi nënkolonel Philip Osment.