Ministria e Mbrojtjes - Arkivi 2008-2013

Prezantohet zëvendësministri i Mbrojtjes, z. Dritan Hila

08 tetor 2013

b_210_140_16777215_00___images_galeria_2013_Tetor_08_1.jpgNë ambientet e Ministrisë së Mbrojtjes u zhvillua sot një ceremoni e veçantë me rastin e prezantimit të zëvendësministrit të Mbrojtjes z. Dritan Hila. Të pranishëm në këtë ceremoni ishin: ministrja e Mbrojtjes, znj. Mimi Kodheli, shefi i Shtabit të Përgjithshëm të Forcave të Armatosura (FA), gjeneralmajor Xhemal Gjunkshi, zëvendësshefi i Shtabit të Përgjithshëm të FA, gjeneralmajor Viktor Berdo, drejtues dhe ushtarakë të lartë në Ministrinë e Mbrojtjes dhe Shtabin e Përgjithshëm.

Në fjalën e saj përshëndetëse me këtë rast, ministrja e Mbrojtjes, znj. Mimi Kodheli u shpreh: “Kam kënaqësinë të prezantoj sot përpara jush  zëvendësministrin e Mbrojtjes, z. Dritan Hila. Dritani, ka vijuar më tej, znj. Kodheli, ka shërbyer për një kohë të gjatë në konsullatat tona jashtë vendit. Ai është një analist, gazetar dhe profesionist i shquar”.

Duke u ndalur tek rëndësia që ka institucioni i Ministrisë së Mbrojtjes, ministrja Kodheli ka theksuar: “Kemi shumë gjëra për të bërë, duke filluar që nga ristrukturimi e deri tek përpunimi i strategjive, në mënyrë që të bëhet e mundur çuarja përpara e misionit tonë si Ministri e Mbrojtjes dhe si Forca të Armatosura, për aq kohë sa vendi ynë është anëtar i NATO”. Më tej gjatë fjalës së saj, ministrja e Mbrojtjes, znj. Mimi Kodheli ka shprehur bindjen se z. Hila do të këtë mbështetje të plotë në detyrën e tij fisnike dhe të vështirë. “Unë jam shumë e kënaqur me këtë vendimmarrje të kryeministrit Rama, sepse e shoh Dritanin, jo vetëm si një person të denjë për të qenë në këtë pozicion ku është, por edhe si një bashkëpunëtor shumë të mirë timin”.
Në fund të fjalës së saj, ministrja e Mbrojtjes, Kodheli ka falënderuar të gjithë stafin e Ministrisë së Mbrojtjes dhe Shtabit të Përgjithshëm për punën që ka bërë deri më sot dhe për mbështetjen që i ka dhënë asaj në pozicionin e ministres së Mbrojtjes.