Ministria e Mbrojtjes - Arkivi 2008-2013

Mbërrin në Shqipëri “COUGAR” i tretë

Ministrja Kodheli: Ngjarje e veçantë për Forcat e Armatosura

18 dhjetor 2013

Foto Galeri

b_230_153_16777215_00___images_galeria_2013_Dhjetor_18a_2.jpgSot pasdite, në mjediset e Komandës së Forcave Ajrore në Rinas u zhvillua ceremonia e mbërritjes së helikopterit “COUGAR”. Ky helikopter është i treti që i bashkohet Forcës Ajrore dhe është ndërtuar në zbatim të kontratës ndërmjet Ministrisë së Mbrojtjes të Republikës së Shqipërisë dhe kompanisë franceze “Eurocopter”, nënshkruar më 17 dhjetor të vitit 2009. Në këtë ceremoni ishin të pranishëm: ministrja e Mbrojtjes, znj. Mimi Kodheli, shefi i Shtabit të Përgjithshëm i FA, gjeneralmajor Jeronim Bazo, gjeneralë dhe ushtarakë të tjerë të lartë të Ministrisë së Mbrojtjes, Shtabit të Përgjithshëm dhe Forcave të Armatosura.

E pranishme ishte gjithashtu edhe ambasadorja e Republikës së Francës në Shqipëri, znj. Christine Moro si dhe përfaqësues të kompanisë “Eurocopter”.

Pas fjalës së hapjes që mbajti komandanti i Komandës së Forcës Ajrore, gjeneral brigade Frederik Beltoja, të pranishmit në ceremoni i përshëndeti ministrja e Mbrojtjes, znj. Mimi Kodheli, e cila, ndër të tjera, e cilësoi këtë ngjarje tepër të veçantë për të gjithë Forcat e Armatosura. “Pajisja e Forcave të Armatosura me helikopterët “COUGAR”, mundëson që Forca  Ajrore të rrisë kapacitetet e saj operacionale, e parë kjo edhe në raport me objektivat e kapaciteteve që kjo Forcë duhet të zhvillojë në kuadrin e gjithë objektivave dhe kapaciteteve që Forcat tona të Armatosua duhet të përmbushin si detyrim ndaj Aleancës”, theksoi ministrja Kodheli.

Ministria e Mbrojtjes, Shtabi i Përgjithshëm dhe Forca Ajrore, janë përkujdesur për trajnimin e personelit që do të shërbejë në këta helikopterë, sipas standardeve më bashkëkohore të NATO.

Ministrja e Mbrojtjes, znj. Mimi Kodheli, theksoi gjithashtu se, në arritjen e standardeve të Aleancës kemi pasur mbështetjen e aleatëve dhe miqve tanë, ku do të veçoja atë të përfaqësuesve dhe trajnuesve të vendeve mike si Franca dhe Britania e Madhe. “Cougar” që ka mbërritur sot është helikopteri tretë që bëhet pjesë e Forcave tona Ajrore. Ai është një helikopter i variantit “transport”, i tipit shumë funksional, i cili do të përdoret kryesisht për transport trupash, por në rast nevoje, mund të përdoret edhe për transport ngarkesash apo misione të ndryshme specifike. Helikopterët “Cougar” janë nga më modernët dhe operojnë në të gjitha kushtet meteorologjike, ditën dhe natën, në misione të vështira, operacione luftarake, si dhe në mbështetje të Forcave Tokësore apo Detare. “Cougar” është një helikopter me dy motorë, prodhuar nga kompania “Eurocopter”, i pajisur me një sërë pajisjesh të veçanta, të cilët bëjnë të mundur që të përdoret më së miri për të kryer detyrat luftarake.