Ministria e Mbrojtjes - Arkivi 2008-2013

Kryeministri Rama dhe ministrja Kodheli bashkëbisedojnë me paqeruajtësit në Afganistan

23 dhjetor 2013

Foto Galeri

b_210_140_16777215_00___images_galeria_2013_Dhjetor_23_09.jpgNë prag të festave të fundvitit, kryeministri i vendit, z. Edi Rama dhe ministrja e Mbrojtjes, znj. Mimi Kodheli uruan ushtarakët tanë në Afganistan. Përmes një video konference, drejtuesit e qeverisë shqiptare dhe shefi i Shtabit të Përgjithshëm të FA, gjeneralmajor Jeronim Bazo, shprehën mirënjohjen e tyre për kontributin e madh që japin trupat tanë në misione të ndryshme nëpër botë. Në këtë ceremoni ishin gjithashtu të pranishëm drejtues të FA, prindër, bashkëshorte dhe fëmijë të ushtarakëve që janë me mision në Afganistan.

Kryeministri, z. Edi Rama duke iu drejtuar trupave tanë paqeruajtëse në Afganistan, u shpreh: “Është krenari që ne një vend i vogël, përmes jush, mund të jemi krah për krah aleatëve dhe partnerëve tanë të mëdhenj dhe njëkohësisht, është privilegj dhe nder i madh për mua që ky pozicion më jep mundësinë të komunikoj me ju dhe t’ju uroj sot nga zemra: gëzuar Krishtlindjet, gëzuar Vitin e Ri!”. “Nga ana tjetër, - vijoi ai, - unë dua t’ju siguroj, sepse edhe mesa po shoh, se fëmijët i keni në formë, familjet i keni mirë dhe sigurisht ata mezi ju presin dhe ju mezi prisni të ktheheni. Jam i bindur që deri ditën e fundit do të jeni të përqendruar në realizimin me sukses të misionit dhe jam po ashtu i bindur se, krah për krah me aleatët dhe partnerët tanë të mëdhenj, ju do të merrni të gjithë atë eksperiencë të domosdoshme dhe shumë të nevojshme për ne, për FA këtu, që do të pasurojë më tutje eksperiencën tuaj të përbashkët me kolegët këtu dhe, do të jetë një tjetër gur në murin e eksperiencës së Forcave të Armatosura”. Gjithashtu, kryeministri Rama uroi për festat e fundvitit edhe përfaqësuesit e ushtrisë amerikane dhe vendeve aleate të pranishëm në këtë bashkëbisedim.

Ministria e Mbrojtjes, znj. Mimi Kodheli, u shpreh se qeveria shqiptare është besimplotë tek Forcat e Armatosura. “Përshëndetje djema, përshëndetje “Eagle 7”, përshëndetje MAT, përshëndetje të gjithëve! Ju uroj t’ia kaloni sa më mirë. Kujdesuni për veten, kujdesuni të përmbushni detyrimin fisnik për të cilin jeni atje”. “Në vijim ministrja Kodheli theksoi se, bashkë me gjeneral Bazon dhe gjithë stafin jemi munduar t’ju mundësojmë edhe një prani të familjarëve tuaj, të cilët po ju shikojnë nga ekrani. Besoj që kjo është një ditë e shënuar për ju ashtu siç është edhe për ne, për t’ju transmetuar edhe njëherë besimin që kemi tek ju dhe mbështetjen që qeveria shqiptare, z. Edi Rama, ka për ju, për familjet tuaja dhe për të gjithë Forcat tona të Armatosura. Do ta mbyll, duke ju uruar të kaloni sa më mirë brenda mundësive tuaja festat. Le të urojmë që viti 2014 të jetë më i miri i të gjithë këtyre viteve!

Në emër të kontingjenteve që drejtojnë përshëndetën, nënkolonel Ardian Beqaj, përfaqësuesi i lartë pranë Shtabit të ISAF, Kabul, nënkolonel Leonard Zhupa, komandanti i kontingjentit MAT, Kabul dhe major Pali Dakolli, komandanti i kontingjentit “Eagle -7” në Kandahar.

Në përfundim të këtij bashkëbisedimi mjaft emocionues, kryeministri Rama dhe ministrja Kodheli shpërndanë për fëmijët e ushtarakëve paqeruajtës dhurata të ndryshme për festat e fundvitit.