Ministria e Mbrojtjes - Arkivi 2008-2013

Ministrja Kodheli: Forcat e Armatosura nuk do të nëpërkëmben si tetë vitet e shkuara

24 dhjetor 2013

b_230_158_16777215_00___images_homepage_mimi_kodheli_parlament.jpgMinistrja e Mbrojtjes, znj. Mimi Kodheli, duke folur sot në Kuvendin e Shqipërisë për buxhetin e vitit 2014, siguron se paratë e taksapaguesve shqiptarë do të mirëmenaxhohen. Zonja Kodheli garanton të gjithë efektivat e Forcave të Armatosura dhe të gjithë qytetarët, që nuk do të lejohen më sjellje të padenja për ushtrinë tonë aleatë të NATO, siç ka qenë përdorimi i saj në funksion të fushatës së shkuar elektorale. Ministrja e Mbrojtjes u ndal edhe tek borxhi që ka trashëguar në këtë ministri nga paraardhësi i saj, në vlerën 15 milionë dollarë, përfshirë këtu deri edhe pagesën e trupave tona paqeruajtëse në misione të ndryshme ndërkombëtare.

Fjala e plotë e ministres së Mbrojtjes Kodheli në Kuvendin e Shqipërisë

Kur morëm 100 ditë më parë çelësat e zyrave, konstatuam në mënyrë të faktuar se FA ishin kthyer në depo personale dhe në bazën logjistike të partisë në pushtet. Çdo ditë po auditojmë, kontrollojmë, inspektojmë sipas ligjit, çdo procedurë tenderimi, prokurimi, emërimi apo gradimi. Kemi vënë në lupën e ligjit të gjithë veprimtarinë e Agjencisë Inteligjente të Mbrojtjes (AIM), Ndërmarrjen e Import-Eksportit Ushtarak, Institucionet e Vartësisë, vetë Ministrinë dhe SHPFA. Kompleksiteti i çështjeve të trajtuara është shumë i madh, por jemi në përfundim të të gjithë kontrolleve të nisura pas marrjes së mandatit. Ka institucione, brenda apo në varësi të ministrisë, të cilat nuk ishin audituar prej vitesh. Kjo ka bërë të mundur keqmenaxhimin e parave të taksapaguesve shqiptarë. U kemi thënë shqiptarëve hapur, se mbi bazën e shifrave, kur ishim në opozitë, rruga e qeverisjes së qeverisë deri dje, ishte rruga e rrënimit të themeleve të ekonomisë së vendit, rrënimit të dinjitetit, pseudosukseseve, se politika e tyre e vjetër e borxheve të pashlyera, po e fuste Shqipërinë në qorrsokak dhe e futi. I kemi thënë shqiptarëve se, me të ardhur në qeveri do të gjenim një gjendje më të rëndë, të shifrave të manipuluara. Sot, vështirësia në ekzekutimin e buxhetit për vitin 2014 rritet shumë, për shkak të detyrimeve financiare ose borxheve të mbajtura nga vitet e kaluara dhe të papaguar, rrjedhojë e përdorimit të buxhetit në mënyrë abuzive dhe shpeshherë për nevoja elektorale. Kështu për Ministria e Mbrojtjes (MM) për vitin 2014 do të na duhet të mbajmë në kurriz, jo pak, por 1.550.000 milion lekë, ose 15 milion dollarë detyrime të pa shlyera, që datojnë shumë herët dhe që janë 10% e totalit të buxhetit të MM për vitin 2014. Kështu, ne do të na duhet të paguajmë nga buxheti i vitit 2014, 334 milion lekë detyrime, si paga, shpenzime të tjera personeli, dieta, si të atij ushtarak dhe atij civil, detyrime që u përkasin viteve 2010-2013. Do të na duhet të paguajmë 194 milion lekë të tjera detyrime ushqim i ushtarakëve, të papaguara. Ju zotërinj, i hoqët bukën ushtarakëve, trajtimin modest në mensa. Situata financiare e krijuar në MM, nuk ka kursyer as misionet tona të dërguara në Afganistan, aty ku luftohet, të cilat ne do t’i paguajmë që në ditët e para të vitit 2014. Ne, gjithashtu do të na duhet të paguajmë 328 milion lekë detyrime të papaguara, një kontratë absurde shumëvjeçare abuzive të lidhur me këtë ministri, pa pasur buxhet të miratuar, uniformat e ushtarakëve që janë o të dala boje, apo të huazuara nga vende të tjera. Rreth 4 milion dollarë kanë dalë në tre vitet e fundit për shërbimin e dializës të një spitali privat; nga 72 veta që janë shërbyer, dy janë pjesëtarë të ushtarakëve. Shumë mirë keni bërë që i keni shërbyer 70 qytetarëve të tjerë, por, paratë për ushtarakët, janë para për ushtarakët.

Projekti i buxhetit të vitit 2014 në MM parashikon të jetë 14 miliard e 151 milion lekë që përfaqëson 1.2 për qind të PBB. Dhe ky është buxheti më i mirë që harmonizon drejt interesat e taksapaguesve dhe prioritetet e PS. Është një buxhet i bazuar në mundësitë reale që gjeneron aktualisht ekonomia jonë. Në kushtet e rrënimit të ekonomisë së trashëguar, arritja më e madhe që ne kemi mbërritur është pastrimi që i bëmë buxhetit të MM nga fondi i pensioneve dhe ushtarakëve. Thuhet se 30% e buxhetit të deritanishëm, ishte një artific i shtuar qëllimisht për t’i treguar vendeve aleate që ne po i rrisnim shpenzimet për ushtrinë. Shqipëria ka nevojë të përmbushë në fakt disa detyrime jetike ndaj aleatëve dhe njëri prej tyre është se trupat tona duhet të modernizohen, të pajisen me armatim modern. Këtu e kam fjalën për trupa që janë të përgatitura për të shkuar në misionet tona paqeruajtëse. Këta zotërinjtë ia kishin premtuar NATO batalionin e Këmbësorisë së Motorizuar të ishte i gatshëm në vitin 2014. Ju tregoj ushtrinë që gjeta. Jo një batalion, por as edhe një togë e një kompanie nuk ka as edhe një pushkë të standardeve të NATO. E dini sa bën të pajiset një togë me armatim të lehtë? Vetëm 10 mijë dollarë. Por edhe pse gjendemi përpallë nevoja kushtetuese që ka ushtria shqiptare dhe përballë nevojave reale, asnjëherë të plotësuara që ajo ka për modernizimin e saj si një ushtri e denjë e një vendi anëtar të NATO, ne do t’ia dalim, pasi nuk do të harxhojmë 3 milion dollarë të destinuara për këtë modernizim, që në fakt ju i harxhuat komplet për AIM, për më tepër kur ky shërbim kishte paratë e tij.

Ne do t’ia dalim, pasi nuk do të harxhojmë 1.8 milion dollarë të modernizimit për aktivitete shpirtërore, në kuadër të shumë ministerialeve, ku nëna e bën tenderin dhe djali e fiton.
Ne do t’ia dalim, pasi siç e kemi edhe treguar në këto 100 ditë, kemi 8 milion dollarë të kthimit të FA drejt shtetit ligjor, kemi një shef të ri të SHPFA dhe një ish-ministër të Mbrojtjes të kallëzuar penalisht.
Ne do t’ia dalim, sepse do të përmirësojmë rrënjësisht menaxhimin financiar dhe kontrollin, që çdo qindarkë e destinuar për FA të shkojë detyrimisht aty ku është projektuar, të përdoret në mënyrë efikase. Për këtë qëllim ne do të forcojmë në një shkallë më të lartë përgjegjësinë menaxheriale të të gjithë njësive shpenzuese deri tek nëpunësi më i lartë autorizues.
Ne do t’ia dalim, pasi në mirëmenaxhim të parave do të jetë një audit i kulluar dhe funksional, i cili do të mbështesë arritjet e objektivave tona për përdorimin efektiv dhe efikas të të gjitha burimeve ekonomike.
Ne do t’ia dalim, pasi do të forcojmë disiplinën financiare nëpërmjet përsosjes së procedurave të vendimmarrjes në përdorim të parave publike.
Ne do t’i dalim të mbështesim komunitetin në emergjencat civile. Kurrë nuk do të angazhojmë FA dhe teknikën e saj në funksion të interesave elektorale, siç ka ndodhur rëndom në qeverisjen e kaluar. Vetëm karburanti i përdorur për këtë qëllim, pa llogaritur kostot e tjera për vitin 2013, llogaritet me qindra milion lekë. Nuk do të lodhem së përsërituri shifrat për karburantin e shpenzuar, ku më shumë se 62.000 litra u shpërndanë pa asnjë dokument në muajt maj-qershor 2013, duke boshatisur tërësisht rezervat e MM dhe duke cenuar rëndë gatishmërinë e ushtrisë. Kam një fotografi në zyrën time, por nuk e kam sjellë këtu në respekt të etikës parlamentare, ku shihen ushtarë me mëngë të përveshura dhe një ish-deputet që nuk u bë dot deputet, i hipur në majë të kovës së një ekskavatori të ushtrisë shqiptare. Kjo nuk do të jetë më pamja as e ushtrisë, as e deputetit, madje as e ekskavatorit.
Ne do t’ia dalim, pasi do të përdorim të ardhurat që ushtria siguron nga demontimi i municioneve, shitja e armatimit, apo shitja e pronave, shfrytëzimi apo dhënia me qira e tyre. Eksperiencat e kaluara edhe në këtë sektor janë antiligjore dhe abuzive. Në këtë kuadër ne do të bashkëpunojmë me Ministrinë e Financave, në mënyrë që trashëgimia e akumuluar ndër dekada të jetë në shërbim të modernizimit të ushtrisë dhe të lehtësojë barrën e taksapaguesve për ushtrinë.
Ne do t’ia dalim, të rishikojmë të gjitha angazhimet tona në lidhje me pronat. Ato synojnë përshpejtimin e procedurave për shitjen e tyre, si dhe pjesëtimin e kostove me ministritë që janë të përfshira në këtë proces.

Do të orvatemi fort, që të shkurtojmë shpenzimet që nuk na duhen, do të përdorim në mënyrë efikase paratë në dispozicion, do të luftojmë në çdo sfond korrupsionin. 100 ditët e para do të ndiqen nga 100 ditët e dyta e kështu me radhë. Gjithnjë të jeni të bindur, tek ne do të gjeni të njëjtin motiv, si në ditën e parë të punës.
Ju faleminderit dhe Përshumëvjet Gëzuar Festat!