Ministria e Mbrojtjes - Arkivi 2008-2013

QKMBM, koncert artistik për fëmijët dhe familjet e ushtarakëve

28 dhjetor 2013

Foto Galeri

b_210_140_16777215_00___images_galeria_2013_Dhjetor_28_2.jpgMe rastin e festave të Vitit të Ri dhe në zbatim të kalendarit vjetor për vitin 2013, Qendra e Kulturës, Medias dhe Botimeve të Mbrojtjes organizoi sot një aktivitet artistik me temë “Programi i Vitit te Ri 2014”, me fëmijët dhe familjet e ushtarakëve të Forcave të Armatosura.

Në këtë aktivitet festiv ishin të pranishëm: zëvendësministri i Mbrojtjes, z. Dritan Hila, zëvendësshefi i Shtabit të Përgjithshëm i FA, gjeneral brigade Pirro Ahmetaj, kryetari i Komitetit Olimpik Shqiptar, z. Viron Bezhani, ushtarakë të lartë nga Ministria e Mbrojtjes dhe Shtabi i Përgjithshëm, fëmijë dhe familjarë të ushtarakëve të Forcave të Armatosura, si dhe mjaft të ftuar të tjerë.

Aktiviteti festiv u zhvillua në formën e një spektakli artistik, ku u përfshinë një seri elementësh artistikë të interpretuara me nivel e mjeshtëri të lartë nga grupi i fëmijëve që trajnohen në kurse të ndryshme pranë Qendrës Rekreative dhe Sporteve të QKMBM. Programi i këtij aktiviteti nisi në sheshin e madh të Akademisë Ushtarake të Forcave të Armatosura nga Orkestra Frymore Kombëtare e FA, e cila interpretoi muzikë festive, së bashku me fëmijët e ekipeve sportive që demonstruan ushtrime në sporte të ndryshme. Më pas të pranishmit vizituan nga afër një ekspozitë me pikturat më të mira të vitit 2013 të realizuara nga fëmijët e kursit të arteve pamore, si dhe produkte artistike dhe kulturore të realizuara nga QKMBM gjatë vitit 2013.
 
Më pas është çelur koncerti artistik, ku u interpretuan pjesë të ndryshme muzikore, këngë, valle, recitime poetike etj. Nga ky repertor mund të veçohet pjesa operistike “Ave Maria” interpretuar nga soprano Juna Resuli; kënga “Vitet e shkollës” interpretuar nga Redon Makashi dhe fëmijët e kursit të kitarës; kolazhi me këngë interpretuar nga fëmijët e kursit të kantos; cikli me poezi interpretuar nga fëmijët e kursit të aktrimit; demonstrim nga fëmijët e ekipit të karatesë “Dardania” etj. “Programi i Vitit të Ri 2014”, veç të tjerave, ishte një tjetër tregues që evidentoi edhe njëherë punën dhe përkushtimin e treguar nga specialistët dhe punonjësit e QKMBM për realizimin e aktiviteteve të përmasave të tilla, të cilat mbajnë gjallë jetën dhe veprimtarinë kulturore në Forcat tona të Armatosura.  
 
Në fund të këtij aktiviteti artistik, për fëmijët e Qendrës së Rekreacionit dhe të ekipeve sportive pranë QKMBM u ndanë dhuratat e Vitit të Ri. Zëvendësministri i Mbrojtjes, z. Dritan Hila, i dhuroi pakon e Vitit të Ri vogëlushes Egi Vogli, vajzës së Dëshmorit të Atdheut, kapiten Feti Vogli, si dhe uroi për festat e fundvitit të gjithë fëmijët e ushtarakëve pjesëmarrës në këtë aktivitet. Dhuratat për fëmijët e ushtarakëve që trajnohen pranë QKMBM u mundësuan nga Ndërmarrja Ushtarake e Eksport-Importit, MEICO.