Fjala e ministres Xhaçka me rastin e Ditës të Vizitorëve të Shquar të stërvitjes “Albanian Lion 2018”

Fjala e plotë e ministres së Mbrojtjes znj. Olta Xhaçka me rastin e Ditës të Vizitorëve të Shquar të stërvitjes “Albanian Lion 2018”, mbajtur në sheshin "Nënë Tereza", Tiranë.

Të nderuar të ftuar,
Të nderuar deputetë, ambasadorë
I nderuar gjeneralmajor Stickland,
I nderuar gjeneral Kollçaku,
Të nderuar gjeneralë dhe ushtarakë të Forcave tonë të Armatosura pjesëmarrës në këtë stërvitje të jashtëzakonshme, “Albanian Lion 2018”.

Më lejoni të nis fjalën me një përshëndetje për 1200 ushtarakët e përfshirë në këtë stërvitje, të ardhur nga Britania e Madhe, Kroacia, Kosova e Shqipëria. Më lejoni dy fjalë në anglisht për miqtë tanë britanikë e kroatë.
Distinguished members of the Armed Forces of the United Kingdom and longstanding friend in good and bad times, Croatia. A few words in English to express my highest appreciation for the professionalism shown during the Albanian Lion 2018. I am impressed with what you have shown in the field of exercise. The reputation of the Royal Marines is well known and we were honored to train together. On behalf of the our Armed Forces, I can only express my deepest gratitude for the cooperation so far. Together we are stronger.

Një nga risitë e rëndësishme të kësaj stërvitjeje të përbashkët është se bashkë me ne u stërvit edhe Forca për Sigurinë e Kosovës. Të dashur vëllezër të FSK, ju përshëndes për përgatitjen e shkëlqyer që treguat, për seriozitetin e madh e për dinjitetin me të cilin prezantuat Republikën e Kosovës në këtë stërvitje të parë të FSK krah aleatëve tanë të mirë, por jo vetëm, edhe ndër më të përgatiturit në botë. Ju përshëndes!

Të nderuar ushtarakë të Forcave tona të Armatosura,
Ju përshëndes e ju përgëzoj për organizimin shumë kompleks të kësaj stërvitjeje, e para e këtij lloji në vendin tonë, kjo stërvitje shërbeu që jo vetëm partnerët tanë apo ne si Ministri e Mbrojtjes, por çdo shqiptar të shohë sa përkushtim, sakrificë, përgatitje e rezultate të shkëlqyera kanë arritur djemtë e vajzat tona krah aleatëve tanë. Ushtarakë të Forcave të Armatosura të Republikës së Shqipërisë, jemi gjithnjë krenarë për ju!

Jo pa qëllim evidentova përgatitjen e rezultatet, se kjo stërvitje e përbashkët nuk është çfarë shohim sot këtu. Por, për 3 javë tashmë, rajonet tona stërvitore dhe bazat tona ushtarake (duke filluar nga Porto Palermo, Pashalimani, Karaburuni, Kepi i Palit, Rinas, Farkë, Zall-Herr dhe Bizë) patën këta mysafirë të veçantë dhe u bënë arenë e stërvitjes së përbashkët shumëkombëshe, tashmë tradicionale, “Albanian Lion 2018”.

Kjo stërvitje, këtë vit bashkoi 1200 trupa, dhjetëra mjete tokësore, detare dhe ajrore nga Forcat e Armatosura të Republikës së Shqipërisë, Britanisë së Madhe, Kroacisë dhe për herë të parë edhe të Forcës së Sigurisë së Kosovës një forcë, e cila po ngrihet, po rritet, e po tregon dita-ditës përgatitje, seriozitet e përgjegjshmëri të lartë si faktor stabiliteti për Kosovën e për rajonin.
Zhvillimi i kësaj stërvitje është demonstrim i vullnetit të përbashkët të vendeve tona për të bashkërenduar përpjekjet e për të rritur shkallën e profesionalizmit, aftësive ndërvepruese dhe kohezionit ndërmjet Forcave tona të Armatosura, për përballimin e sfidave të përbashkëta dhe rritjen e sigurisë dhe të cilësisë së jetës së qytetarëve tanë.

Vitin tjetër ne do ta 5-fishojmë pjesëmarrjen në “Albanian Lion”, të bindur se nga stërvitjet e përbashkëta përfitojmë të gjithë, duke rritur sigurinë brenda hapësirës së vendeve tona dhe NATO.
Pjesëmarrja në operacione si dhe stërvitje të tilla i ka rritur dhe pjekur profesionalisht Forcat tona të Armatosura, i ka bërë ato më të përgjegjshme për rolin e tyre për paqen e sigurinë, më të afta për të përballuar sfidat e përbashkëta dhe sigurisht gjithnjë e më dinjitoze krah aleatëve tanë.
Tanimë ne jemi përfshirë në një zhvillim dhe modernizim të vazhdueshëm të FA, në përshtatje me kërkesat e Aleancës si dhe ndryshimet në ambientin e sigurisë si brenda ashtu edhe jashtë vendit.
Ky proces, por edhe kjo stërvitje sot i paraprin një eventi tjetër të rëndësishëm, pasi pas pak ditësh, për herë të parë, ekspertë të NATO, të cilët janë sot në Bizë me ushtarakët tanë duke vlerësuar përgatitjen e tyre, do të certifikojnë grup-batalionin tonë të parë. Bëhet fjalë për rreth 1600 ushtarakë bashkë me komponentët e kimisë, artilerisë e EOD-së, të cilët për herë të parë do të certifikohen si të stërvitur, të mirë pajisur dhe të ndërveprueshëm në standardin më të mirë të NATO-s, në dispozicion për t’u angazhuar kudo ku Aleanca do të ketë nevojë.

Pavarësisht këtyre zhvillimeve pozitive dita-ditës, trupat tanë na kanë bërë krenarë kudo nëpër botë ku kanë shërbyer në misionet e operacionet e NATO e Bashkimit Europian. Nga anijet tona Butrinti, Oriku e Lissus në detin Egje që kanë shpëtuar mijëra jetë njerëzish, tek ushtarakët tanë në Afganistan, të vlerësuar maksimalisht, tek ata në Letoni, Kosovë, Mali, Bosnje-Hercegovinë etj. Kudo ku kanë shërbyer i kanë dhënë nder flamurit tonë.
Krahas stërvitjeve me natyrë ushtarake, Forcat tona të Armatosura janë të angazhuara fuqimisht dhe po mbajnë peshën kryesore edhe në përballimin e Emergjencave Civile, duke bërë të mundur shmangien e humbjes së jetëve njerëzore dhe minimizimin e dëmeve materiale. Kemi përballuar në shumë pak kohë përmbytjet e njëpasnjëshme dhe zjarret këtë verë që falë gatishmërisë dhe organizimit nuk dolën kurrë jashtë kontrollit.

Të nderuar miq,
“Albanian Lion 2018” vjen jo vetëm si element i rëndësishëm i tablosë së performancës së Forcës sonë të Armatosur, por dhe të rritjes së ndërveprimit me fqinjët dhe aleatët. Ne jemi tepër të qartë në orientimin tonë pro vlerave perëndimore dhe në mënyrë progresive e të vazhdueshme po vijojmë përmbushjen e detyrimeve tona si ndaj Aleancës ashtu edhe drejt integrimit në BE.
Vendi ynë, pavarësisht përmasave dhe resurseve të limituara, mbetet vend me kontribute të qenësishme në NATO dhe ne jemi të angazhuar të mbështesim të gjitha iniciativat në interes të rritjes së sigurisë së vendit, rajonit dhe hapësirës së NATO.
Pas nëntë vitesh anëtarësimi në NATO, vendi ynë është transformuar në një faktor dhe po kontribuon në mënyrën më të mirë të mundshme në sigurinë dhe stabilitetin e rajonit tonë.
Vendimi i Këshillit të Atlantikut të Veriut, për të financuar realizimin e projekteve të përbashkëta me Aleancën për modernizimin e Bazës së Kuçovës dhe kthimin e saj në një bazë të NATO-s, është konfirmim i rolit dhe përgjegjësisë së vendit tonë, dëshmon peshën dhe përparësinë që përfaqëson Shqipëria për sigurinë dhe paqen në rajon, duke marrë në konsideratë faktin që Baza Ajrore e Kuçovës është e vetmja bazë e NATO-s në Ballkanin Perëndimor.
Baza e Kuçovës është një lajm shumë i mirë për të gjithë. Është lajm i mirë në veçanti për vendin tonë, por është lajm i mirë edhe për rritjen e sigurisë në rajonin tonë. Kuçova nuk është një zgjedhje rastësore. Por është rrjedhojë e seriozitetit dhe rolit koherent të Shqipërisë e te shqiptarëve si faktor shumë i rëndësishëm stabiliteti për paqen në rajon.
Shqipëria, ka arritur tashmë edhe pjekurinë dhe aftësitë për të drejtuar procese të rëndësishme në fushën e sigurisë dhe duke filluar nga nëntori i këtij viti, do të marrim kryesinë e RACVIAC, Qendrës për Siguri dhe Koordinim, me qendër në Kroaci që ka për mision dialogun dhe bashkëpunimin në fushën e sigurisë mes vendeve të Europës juglindore.
Po ashtu në vitin 2019, Shqipëria do të marrë drejtimin e Kartës së Adriatikut dhe SEEDM-it, të cilat janë struktura dhe instrumente të rëndësishme të sigurisë dhe bashkëpunimit rajonal.

Të nderuar ushtarakë pjesëmarrës në stërvitjen “Albanian Lion 2018”,
Në mbyllje, duke perifrazuar thënien e te madhit Wiston Churchil, duke qenë e vetëdijshëm se betejat, përpara se të fitohen në fushën e luftimit, duhet të fitohen në fushën e stërvitjes, sot kam kënaqësinë të pohoj se me realizimin me sukses të “Albanian Lion”, ju e keni fituar betejën tuaj.
Më lejoni edhe njëherë t’ju përshëndes dhe t’ju uroj suksese në punën tuaj fisnike.
Faleminderit!

Submit to FacebookSubmit to Google PlusSubmit to TwitterSubmit to LinkedIn


Ministeriali i NATO, Xhaçka: 2% e PBB për FA deri në vitin 2024 4-5 tetor 2018Ministrja e Mbrojtjes, Olta Xhaçka mori pjesë në Ministerialin e Mbrojtjes së vendeve anëtare të Aleancës të Atlantikut të Veriut...
Buletini mujor nëntor 2018Ditari, të rejat kryesore nëntor 2018...
Ministrja Xhaçka vizitë zyrtare në SHBA 17-18 prill 2018Washington - Shtetet e Bashkuara të Amerikës e vlerësojnë Shqipërinë një aleat të denjë të NATO dhe vend lider në Ballkanin Perëndimor...
FA shpëtojnë nënën e sëmurë në Kukës27 shkurt 2018Pas 3 orë ecjeje në këmbë, Forcat Armatosura kanë arritur të transportojnë për në spitalin rajonal të Kukësit...
Ministeriali i NATO, takimi Stoltenberg - Xhaçka14 - 15 shkurt 2018Ministrja Xhaçka merr pjesë në takimin e ministrave të Mbrojtjes të vendeve anëtare të NATO në Bruksel...
Fotogaleri/FA angazhim maksimal për situatën e përmbytjeveNëntor - Dhjetor 2017Angazhimi i Forcave të Armatosura të Republikës së Shqipërisë për situatën e përmbytjeve.
NATO: Misioni i “Orikut” në Egje, moment i rëndësishëm për Forcat Detare shqiptare24 nëntor 2017Misionit të anijes patrulluese të forcës detare shqiptare “Oriku”, e cila ishte pjesë e operacionit të NATO-s, “Sea Guardian”, i është dedikuar një shkrim në faqen zyrtare të NATO-s...
BBC: Shqipëria rehabiliton varrezat e dëshmorëve pas dekadash të lëna në harresë15 nëntor 2017Prestigjiozja britanike BBC, i ka bërë jehonë nismës së Ministrisë së Mbrojtjes për rehabilitimin e varrezave të dëshmorëve...
Mbyllet takimi i shefave të Mbrojtjes të NATO17 shtator 2017Mbylli punimet formale Konferenca e Komitetit Ushtarak të NATO, e cila u zhvillua për herë të parë në vendin tonë...
Zhvillohet në Tiranë Konferenca e Komitetit Ushtarak të NATO16 shtator 2017Në vendin tonë ka nisur punimet Konferenca e Komitetit Ushtarak të NATO, e cila mbledh së bashku shefat e shtabeve të ushtrive të vendeve anëtare të Aleancës...
Intervistë me gjeneral Petr Pavel, kryetar i Komitetit Ushtarak të NATO15 shtator 2017Intervistë me gjeneral Petr Pavel dhënë për revistën "Mbrojtja"...
Zhvillohet stërvitja shqiptaro-britanike “Ushtar Eagle 17”14 shtator 2017Në kuadër të stërvitjes së përbashkët ndërmjet FA të Shqipërisë dhe FA të Mbretërisë së Bashkuar u zhvillua sot “Dita e Vizitorëve të Shquar” të stërvitjes “Ushtar Eagle 17”...
Programi qeverisës 2017-2021 për Sigurinë dhe Mbrojtjen13 shtator 2017Qeveria e re e RSH mori detyrën pas ceremonisë së betimit në Presidencë. Nga programi qeverisës 2017-2021 veçojmë pjesën që ka lidhje me Sigurinë dhe Mbrojtjen...
Kontributi i Forcave të Armatosura në infrastrukturëShtator 2017Ministria e Mbrojtjes dhe Forcat e Armatosura gjithmonë kanë treguar përkushtim dhe angazhim maksimal në ndihmë të popullsisë civile...
Bëhuni pjesë e Forcave të Armatosuraprill 2018Qendra e Personel Rekrutimit ka filluar regjistrimin e kandidatëve për ushtarë/detarë aktivë dhe kërkon të rekrutojë 100...
Strategjia UshtarakeKorrik 2015Në themel të Strategjisë Ushtarake të Republikës së Shqipërisë është aspirata e popullit shqiptar dhe vullneti politik për të realizuar vizionin e përbashkët...
Direktiva e Mbrojtjes 2018Shkurt 2018 Dokumenti bazë mbi planet dhe programet e punës e të veprimtarive të MM, të FA në përmbushje të misionit kushtetues, si dhe detyrimeve si vend anëtar i NATO...
Revista Mbrojtja Nr. 12 (2018) Dhjetor 2018Numri i fundit i revistës "Mbrojtja"...
Gazeta Ushtria 30 nëntor 2018Numri i fundit i të përjavshmes gazeta "Ushtria"...






Arkivi Lajmeve
Dhjetor 2018
Ma En Pr Sh Di
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6